周三港股衝上250天線之後，昨日回軟算是預期之內。暫時而言，好友仍佔上風，淡友謹記好漢不吃眼前虧，尤其中美高層在北京進行貿易談判，未知會傳好消息定壞消息，所以暫時都係忍忍手！
周三港股升穿牛熊分界線報收，唯獨騰訊控股（00700）逆市低收，昨日再跌1.7%報341.8元，到底股王係咪食錯藥？
有說騰訊逆市回軟，一來是較早一批回升的個股，當恒指升到上28,000點，部分資金開始沽貨獲利；亦有指MSCI公布系列指數成分股變化，騰訊的權重被攤薄而有所下降，所以呢排見到有基金要減番啲貨，致使其股價回軟，但若然如此，相信消化一、兩日就可以喘穩。
繼手機設備股後，又一弱勢板塊翻炒，就係教育股。昨日見澳洲成峰教育（01752）、中國新華教育（02779）、民生教育（01569）、新高教集團（02001）、希望教育（01765）、中教控股（00839）等均可高收。
近幾年內地教育事業確實是百花齊放，卻去到有點亂的地步，引來政府出手整頓是有其必要，短痛將可換來長遠健康發展。至於跟勢短炒，有智慧不如趨勢，反正教育股早前大炒一轉，都係講個勢。教育板塊才第一日異動，不妨繼續留意交投，邊隻人氣盛就小注怡情跟一轉，即日埋單計數，短炒風險可控。
最後提一提，股友都要做好兩手準備，若後市有調整，該不意外，但除非中美談判失敗收場，否則中國救市效應會繼續為市底帶來支持。反之，若中美談判消息送上東風，後市繼續升，都要諗下追啲咩好。
古勝認為，藍籌股之中，港鐵公司（00066）的表現仲係落後，趁住股價喺43元水平整固，可以一試，博上48元，穿41元止蝕。
古勝