絲絲講場：業績好兆頭？滙豐豪派大利是

「獅子銀行」滙豐銀行喺年三十晚宣布，香港員工人人獲派500蚊電子利是，成2萬名員工有份，都派咗成千萬，等大家可以過一個肥豬年！滙豐香港區行政總裁施穎茵（Diana Cesar）仲話，滙豐有一個好豐收嘅一八年，唔通預告嚟緊出嘅全年業績好有睇頭？

滙豐員工周一晨早就收到香港區一姐發出嘅內部電郵，提到過去一年對員工表現好滿意，決定派500蚊大利是，只要喺今個月八日仍屬於香港區嘅在職員工，都可以拎到，大部分員工會喺今日經出糧戶口收到錢。

睇番過去幾年，滙豐好少咁大手筆，一般都係以部門去派利是，或者見到啲部門老闆行過先有封利是仔，大部分都係廿蚊、五十蚊，今次咁正式同高調派利是，相當罕有，尤其早幾年個市唔好，滙豐高層仲要凍薪，更曾傳過該行只向員工派朱古力金幣做開工利是。

查實農曆新年後無耐，滙豐控股（00005）就派一八年全年成績表，香港區一直係集團嘅重要增長引擎，一八年環球不明朗因素處處，但香港區表現仍然亮麗，第三季稅前盈利達29.77億美元（約232億港元），為成個集團貢獻咗半壁江山。今次派利是咁大手筆，相信香港區一八年嘅成績都幾掂！

不過，滙控股價就無運行，狗年最後一個交易日收報65.95元，跌0.23%，成個狗年計更累跌超過兩成！

余絲韻