Market Insight：中資券商股趁勢短炒
港股昨日繼續得個悶字，全世界都係等緊下周中美第二輪貿易談判，簡直有少少農曆新年收爐前的感覺。事實上，恒指熊仔街貨連續幾日累積咗重貨，推上500點左右就已經可食盡相等於4,000張期指合約的熊證，但大戶就係唔郁手，比着往時都唔知食咗幾耐啦！
從另一角度睇，暫時亦未見到大跌誘因，好淡雙方全部企定定，恒指昨日高低波幅得231點，主板成交801億元。
不過，悶市仍見有板塊跑出，其中最顯眼的就係中資券商股，中信證券（06030）、海通證券（06837）、廣發証券（01776）、中國銀河（06881）以及HTSC（華泰證券）（06886）的升幅介乎1至3.4%不等。
信證候破位跟進
炒上理由有創科板方案獲批，帶起券商股氣氛；以及市場人士認為阿爺有機會在農曆新年前再放水，短期內或有一輪春節行情。
睇番滬綜指從本月初低位2,440點開展反彈，以昨日收市價2,591點計，累升咗6.1%已唔算少。咁股市有水到，行業又有炒作憧憬，券商股自然吸引資金押注。短炒策略上，可留意近期走勢唔錯的HTSC，只要短期在成交配合下升破及企穩14元，後市應可更進一步，目標睇16元，止蝕13.4元。
另外，信證股價早前升到15.78元遇阻，在15元整固一輪後已跌唔落，但16元阻力唔細，可等候破位再作跟進，上望18元，止蝕位15元。
古勝