絲絲講場：大鱷18億買紐約豪宅王
著名對沖基金Citadel創辦人格芬（Ken Griffin）完成以約2.38億美元（約18.67億港元）購買可俯瞰紐約中央公園無敵園景嘅「220 Central Park South」四層豪宅單位，成為美國史上最貴豪宅！呢宗交易係格芬喺一五年簽嘅，但最近先完成交易，相信係呢位億萬富豪歷來最大嘅一宗物業交易。
格芬近期全球掃貨
值得一提嘅係，佢天價買入嘅只係「清水房」，意味將會用到數以百萬計美元設計同裝修。
格芬購入嘅單位由50樓去到53樓，總面積達2.3萬平方呎。之不過，大家唔好以為佢係買嚟炒喎。其實佢只不過因為自己公司就喺附近，諗住有番個地方住咋，於是咪買咗呢個物業囉。
格芬近期總共以約7億美元喺全球房地產市場瘋狂「掃貨」，以上嘅中央公園靚景豪宅係當中最大一單刁。據悉，佢早幾日斥1.22億美元買咗倫敦白金漢宮附近嘅豪宅，呢單刁亦榮登倫敦近十年嚟最貴嘅住宅房地產交易。
過去幾年內，數數吓，佢已接連入市芝加哥、邁阿密同紐約最貴嘅房屋；另外更曾經斥2億美元喺佛羅里達州棕櫚灘買下土地起屋。
其實，佢白手興家買嚟住吓未算巴閉，但佢今年只係50歲！《福布斯》富豪榜資料顯示，格芬身家達99億美元。九○年創業，現時管理資產規模達300億美元。服未？！
余絲韻