絲絲講場：商界傑出女性 恒生鄭慧敏No.2
女性喺商界嘅影響力真係唔可以忽視，恒生銀行（00011）副董事長兼行政總裁鄭慧敏（Louisa）接棒做「一姐」只係一年半鬆啲，呢日就已經有好消息，佢榮登《福布斯》一九年中國最傑出商界女性排名榜之中嘅第二位！
中信銀行李慶萍稱冠
呢位恒生歷來第三位女舵手，係香港絕少榜上有名嘅高管，究竟《福布斯》用咩做衡量指標？原來會睇佢哋打骰公司嘅營業規模、管理人數、外界影響力等，用量化方式嚟揀出100名傑出女性。Louisa作為上市藍籌企業嘅唯一女CEO，無番咁上下實力，突圍而出你估咁易。
講到叱咤風雲嘅女性，唔少得中信銀行（00998）董事長李慶萍，佢帶領信行喺產品創新、零售業務發展都有明顯躍進，排名由一八年嘅次位，躍升至今年嘅榜首。
不過，今次爆冷上榜就係第三位嘅百勝中國首席執行官屈翠容。佢哋第一家餐廳喺八七年開業，依家全中國分店超過8,000間。
而內地通用零部件製造公司日機密封（300470.SZ）總經理嘅何方排名第四，以及五糧液（000858.SZ）總經理陳林排第五。
見到呢5位女性喺商界有咁好成績，絲絲真係要加把勁！
余絲韻