絲絲講場：新地基煇基俊堂兄弟拍住上

拒評論帝國會否併入

大少郭炳湘上年不幸過身，郭基俊上個月就被委任為非執董。至於嫲嫲會唔會都想嫡孫參與更多集團業務？郭基煇就話：「我哋集團都要按部就班，好鼓勵佢喺公司做佢想做嘅事，我同我阿叔（郭家第三子、新地主席郭炳聯）都好鼓勵佢」。

郭基煇仲讚呢位堂兄弟好勤力，對酒店、服務式住宅業務特別上心，「始終W酒店係佢父親開則去起」，兩個人會一齊傾點樣改善酒店經營。

至於郭炳湘嘅帝國集團會否併入新地？兩間公司會唔會合作？佢就唔評論。

擬夥機構拓長者服務

另外，郭基煇話，喺審視過房協丹拿山雋悅長者住屋項目之後，考慮將集團旗下十四鄉發展項目加入長者屋元素，並且會夥拍非政府機構一齊去做，新地自己唔會提供老年人服務，但屋苑會所會設有老人設施同埋活動。

集團傾向將長者屋單位出售畀中產以上、「行得走得」嘅老年買家，暫時唔考慮出租。

余絲韻