絲絲講場：見工邂逅 齊手創立巨企
貝索斯同麥肯齊識於微時，兩人曾經係普林斯頓大學校友，其後九十年代初喺對沖基金D.E.Shaw工作時邂逅，當時麥肯齊應徵見工，貝索斯係第一位進行面試嘅人，兩人成為同事後，亦好快成為情侶，拍拖三個月後就訂婚，並喺九三年拉埋天窗。
翌年，貝索斯打算創辦網上書店，佢哋就搬到華盛頓州，因為當地鄰近好多全球最大嘅書倉庫，當時麥肯齊負責揸車，貝索斯就攞起手提電腦編寫業務計劃書，見證亞馬遜由初創企業，發展到今時今日，成為全球最大市值企業嘅經過。
模範夫妻25載緣盡
現時貝索斯與麥肯齊育有四名兒女，貝索斯去年九月透露自己好重視同家庭喺早上嘅生活，所以朝早十點前唔會舉行會議。貝索斯亦曾經講過，為老婆洗碗係自己所做嘅最性感事情。他又曾經咁讚老婆：「我認為佢非常機智、聰明、有頭腦同性感。」
多年以來，貝索斯同麥肯齊經常一齊出席公開活動，包括去年初出現喺名利場嘅奧斯卡派對，可惜呢段廿五載婚姻終告失敗。
余絲韻