絲絲講場：貝索斯萬億離婚搞到股東？

貝索斯持有亞馬遜16.3%股權，為最大單一股東，據彭博億萬富豪指數顯示，他現時身家達1,370億美元（約1.068萬億港元）。貝索斯亦係火箭公司Blue Origin創辦人及擁有《華盛頓郵報》，兩夫婦喺美國買入多個豪宅物業。

五十四歲嘅貝索斯周三於Twitter推文，話「經過試驗分居後決定離婚」，亞馬遜則發表聲明，指貝索斯將「繼續專注亞馬遜所有範疇上」。亞馬遜股價周三收市微升0.17%，周四早段報1,630美元，挫近2%。

妻子麥肯齊變女首富

外界估計，貝索斯選擇自爆離婚，因佢可能知道當地兩份小報將會踢爆，佢最近搭上四十九歲嘅前電視節目主持人兼直升機機師桑切斯（Lauren Sanchez），後者嘅丈夫係荷李活金牌經理人懷特塞爾（Patrick Whitesell），兩人正申請離婚，而麥肯齊亦得知貝索斯喺分居期間同桑切斯約會。

目前外界唔知貝索斯與麥肯齊有冇訂立婚前協議，但按照佢哋居住及亞馬遜總部所在嘅華盛頓州法例，若冇協議，二人好可能將平分婚姻期間累積嘅財富，以此推算兩人可各自分得685億美元（約5,343億港元），麥肯齊更可一躍成為全球女首富。其實貝索斯係婚後先至成立亞馬遜，當公司九五年開始運作時，麥肯齊更係公司主要成員。

股權結構難免有變動

表面睇嚟，即使貝索斯被分走一半身家，其亞馬遜第一大股東地位仍穩固，因現時第二、三大基金股東領航及貝萊德，各僅持有逾5%股權。不過有美國大學教授就話，由於貝索斯所有嘅財富都與亞馬遜緊密相連，離婚唔可能對公司全無影響。而喺呢種情況下，預計若貝索斯夫婦平分身家時，貝索斯難免要出售部分公司股份，又或者妻子麥肯齊可能會得到部分亞馬遜嘅股份，而咁樣將改變亞馬遜嘅控股結構。

由此可見，亞馬遜或需創建新嘅股權結構，如同股不同權（WVR）方式，貝索斯透過持有呢類股份保留足夠表決權。至於亞馬遜股價前景已係後話。

而現時係小說家嘅麥肯齊，倘獲分貝索斯一半財富，身家勢拋離現時全球女首富邁耶斯嘅456億美元，後者係法國化妝品公司歐萊雅創辦人Eugene Schueller嘅孫女。

余絲韻