Market Insight：內地谷消費 零售股諗得過

美股已三連升，中港股市當然有運行，恒指昨日大升586點收報26,462點，即市高見26,597點，大戶又食咗一大批熊仔，國指則升224點報10,358點，主板成交增至1,127億元，係威係勢。滬綜指相對失色，僅升0.7%，報2,544點，唔通內地股民唔信阿爺？

事實上，正如古勝早前所言，無論中美談判結果如何，中國點都係蝕底居多，事關即使傾得成，估計中方在條件上都要忍讓，例如對外資企業大開方便之門，又或嚴打「A貨」等，對內地經濟及企業始終會造成打擊。

車股好淡因素並存

故此，即使恒指近幾日從兩萬五樓下彈到上26,462點，但追勢還追勢，考慮到環球經濟數據預示年內或要面對經濟下行風險，投資策略都係要審慎啲好！

昨日多個板塊做好，當中有幾個係資金主要押注對象，分別是汽車、家電及石油相關股。先睇汽車股，有消息指發改委將於今年出台鼓勵汽車消費新政，加上中金剛發表報告，指補貼措施若落實，低端汽車市場有望先行復甦，並看好長城汽車（02333）、吉利汽車（00175）及比亞迪（01211）等。

不過，話就話中美談判有得傾，惟隨時係中方要大減進口汽車關稅，又或增加外資可持股比例，咁屆時「升定先」的汽車股隨時又插過。所以有貨者應趁高食胡，冇貨者就更加唔好掂！

相對而言，家電股就升得較正路，同樣係炒國策扶持，但同時再有幾項利好因素，例如美國加息步伐或減慢，應可令人民幣今年貶值趨勢放緩，變相改善行業盈利前景。

旺季臨近 雙重受惠

考慮到中國外貿出口受阻，中央必定力谷內需，為經濟注入動力，且農曆新年臨近，消費旺季亦有助為板塊沖喜，故資金湧入已累跌不少的家電股尋寶，亦好合情理。

睇見昨日創維數碼（00751）、海爾電器（01169）、海信科龍（00921）、國美零售（00493）及TCL電子（01070）等升幅介乎1.5至11.2%不等，其中前三者的走勢較強，往績市盈率分別約10倍、13倍及3倍，當中又以科龍較平，但純睇人氣，則以海爾最旺場，成交有2.4億元，建議大家可揀隻心水家電股順勢炒轉，但應將止蝕位放在昨日開市起步位，以防萬一。

古勝