絲絲講場：微信常用Emoji暴露年齡層？

90後鍾意「笑到喊」 60後愛畀Like

佢哋話，○○後最鍾意用嘅表情符號係「掩住臉喊」，道出十幾歲嘅無奈，長輩唔明白。而九十後最鍾意用「笑到喊」，因為廿幾歲嘅人生總係邊喊邊笑！年紀再大嘅就樂觀啲，八十後最鍾意「e住排牙笑」；七十後就「掩住嘴笑」；年過55歲嘅就鍾意畀Like人，係「最慷慨嘅鼓勵家」！

當然，以上都係噱頭，騰訊亦都公布咗每個年齡階層嘅習性，例如舊年每個月用微信畀錢買甜品同凍飲嘅○○後，較一七年多超過兩倍，可見佢哋鍾意咩口味！九十後最晏起身，閱讀興趣由娛樂八卦轉向「生活情感」；八十後就鍾意閱讀，內容離唔開國家大事。唔知有無啟示呢？

至於萬眾期待嘅「微信之父」張小龍就喺夜晚七點半先出場，大家梗係想聽吓微信準備點樣印錢啦。佢話，要喺微信度彈啲廣告出嚟唔難，可能過多陣啲人就會慣，但大家每日花咁多時間用微信，就好似最好嘅朋友咁，你會唔會見親朋友都要撕開一浸廣告，先見到佢個樣吖！

當然，可能係佢唔需要啫！公司話，小程序服務用戶超過1,000億次，一年交易量增長超過600%，創造商業價值超過5,000億元人民幣！小遊戲Download三十日後仲有人玩嘅，就多達43%！

余絲韻