絲絲講場：滙豐百年珍藏招呼大客
亞洲愈來愈多有錢人，滙豐銀行最近就喺尖沙咀半島酒店，開設首家滙豐尚玉中心，為可投資資產達100萬美元（約780萬港元）嘅客戶，提供綜合理財及財富管理方案，仲話今年會再增五間尚玉中心！
尚玉中心天花滿布水晶燈，滙豐招牌紅白商標就換上高貴嘅玉石花紋，唔講仲以為去錯珠寶店！原來滙豐一九二九年曾經喺半島開過分行，今次開設中心可以話係「凱旋回歸」，中心入面仲擺放多件珍藏，包括超過一百年前嘅滙豐客戶總帳，同埋董事會會議紀錄等。
理財中心瞄準高淨值人士
中心開設於內地旅客熱門地點，令人聯想滙豐部署內地市場。滙豐銀行尚玉服務策劃拓展主管顏文禮話，該行有六成被邀請升級成為尚玉嘅客戶屬國際客戶。
其實早排市況麻麻，家陣先攻高淨值客戶會唔會有啲危呀？香港區零售銀行及財富管理業務主管欣格雷話，香港有約17萬名高淨值人士，即使金融危機出現，都要為唔同類型嘅客戶提供全面銀行服務，仲計劃二○二○年前喺香港零售銀行同財富管理業務增聘約300人。
余絲韻