Market Insight：息口敏感股伺機翻兜

睇埋直接受惠放水的A股市場，三大指數只有深成指升1.5%，其餘兩者即滬深300同滬綜指都升少過1%，真係好難說服資金進一步追貨，尤其是春江鴨上周五已經率先買貨，當下再追值博率自然差咗一截。

騰訊做好食胡準備

其他唔講，淨睇今轉中美貿易談判結果此因素，經已好影響港股後向走勢。加上英國脫歐進程的發展，就十足十去街市買菜咁有價講，話賣又唔賣，未來可唔可以「有序」脫歐，機會率真係一半半。故暫時睇牌面，中歐美三地都有不明朗因素存在，試問港股又點會唔飄到暈呢？

藍籌股方面，騰訊控股（00700）再一次跑出，全日升2.2%跑贏大市，收報317.6元，成交78.8億元，佔大市整體成交約一成。走勢上，集團股價昨日已初步擺脫自去年十二月初營造的短期下降通道頂部阻力，重上多條主要平均線，走勢繼續改善。如果有跟古勝早前建議，已入貨者不妨等多兩日先收割。

另外，睇番昨日貢獻恒指最多的藍籌股，分別係滙豐控股（00005）、港交所（00388）、長實集團（01113）、中海油（00883）及中國移動（00941），五股合共推升恒指87點，計埋騰訊貢獻的58點，已幫恒指進帳145點，即係其他藍籌表現好一般。所以看官就算見個市反彈，但講到底都係要揀得啱先至有肉食！

話說回頭，上周五中美兩國不約而同地出手，短期雖有利股市氣氛，但卻是機中有危，皆因若然唔係見風頭火勢殺到埋身，又豈會喺踏入一九年即刻出招。值得留意的是，中央雖然在春節前放鬆銀根，增加市場資金流動性，惟撐經濟唔代表個市會大升。

入市仍須靈活變通

再從宏觀角度睇，相信政府亦唔願見到經濟轉差之時股市卻大升，故預期春節前唔會大跌之餘，亦勸大家唔好對後市抱有太大期望。策略上，亦應以保守為主，有勢個股唔係唔追得，但應以快打慢，靈活變通且嚴守止蝕。

既然市場轉炒美國加息速度放慢，咁最直接受惠的相信就係對息口敏感的本地地產股及收息股。不過，前者仍受香港經濟及樓市前景左右，後者變數相對較少，可作為中線投資之選。以近日股價走勢表現，領展（00823）、粵海投資（00270）、中華煤氣（00003）及深圳高速（00548）較為靚仔，大家不妨從中揀選自己心水股，話唔定可提早發個新年財！

古勝