絲絲講場：優品360員工例做白老鼠
香港唔少打工仔包括絲絲，都會入定啲零食擺喺Office傍吓身，但往往就喺最需要呢啲精神支柱時，一拆開包裝、咬落……中伏！絲絲早排見到零食連鎖銷售商優品360（02360）行政總裁許志群，佢就自爆公司入貨避免中伏嘅秘訣。
CEO自爆入貨竅門
如果以為入貨只係買買買，咁就錯嘞！許志群話，採購第一步係「搵料」。咦？乜仲要搵原材料自己整？佢講嘅原來係搵「資料」，首先要知市面興啲咩，要摸清消費者嘅心水。除咗自己搵，向供應商索料都好重要，由於供應商好多時都會提供新產品資訊。唔單止咁，公司仲會參加世界各地嘅展覽會，睇吓有咩特色零食。
有咗目標，就輪到最重要嗰步──試食。搵邊個做白老鼠？就係公司自己嘅員工。許總話，佢哋內部員工有口號「伏等我哋中，好嘢賣出街」喎。
過咗公司內部白老鼠呢關，入得貨喇啩？咪住，好食都未必一定入，事關要睇價錢計吓條數。明晒，講到尾，生意吖嘛。
至於啲包裝靚一靚嗰啲，就要小心啲咁話。點解？許總冇講喎，以閣下嘅轉數，明啦！
話時話，投資者入貨一樣怕中伏，優品360本周五就掛牌上市，又睇過點！
余絲韻