港股一九年第二個交易日，恒指一度失守兩萬五，最終跌65點收報25,064點，國指升1點報9,835點，主板成交683億元。
事實上，唔單止股市係咁，如果睇埋其他投資市場，就真係食定驚風散都得！美股周三晚收市後蘋果公司下調盈利預測，其實只係小點一碟，最主要係投資市場開始對美國經濟增長前景失去信心，且預期今年聯儲局僅加息兩次，若然一個唔好彩，突然暗示停止加息的話，相信市場避險意識會更高。
現時情況係，各類投資市場已經有理無理走定先，最直接係美國加息預期下降，避險意識上升下，美元兌日圓昨日曾閃跌，即市從109樓上急跌至104.7。雖然歐洲市初段已彈番上107水平，但已揭示市場在避險時，傾向選擇日圓，而金價亦一度彈到上1,294美元。
債市方面，美國兩年期及十年期國債孳息率分別回落至2.48厘及2.62厘。要留意，具指標的十年期美債息在去年十一月仲講緊係3.2厘！
講咁耐，其實只係想帶出一個主題，就係踏入一九年，市場避險意識似乎有增無減。今年（起碼首季）似乎真係搵食艱難，股市投資者一係泊入避險板塊避避，一係直接持現金，想在股市中靠炒賣贏錢，勝算真係不大。
雖然避險需求上升推高金價，但唔係隻隻金礦股都買得，好似招金礦業（01818）股價早前已升過一輪，短期點都要抖一抖；紫金礦業（02899）擬增發A股，股價近日走勢急轉直下。
相對地，靈寶黃金（03330）早前股價橫行上落，但昨日破位而上，升6.9%報1.39元，可小注買入博短線衝上前高位1.57元，跌穿1.34元止蝕。再睇埋山東黃金（01787），此股勝在無蟹貨，加上昨日剛剛一支大陽燭頂穿20元關，追勢具一定值博率，以跌穿10天線止蝕。
古勝