絲絲講場：新股高層臥虎藏龍

前法總統兒任職復星旅文

好似復星國際（00656）分拆嘅復星旅遊文化（01992），公司副董事長及副首席執行官亨利‧吉斯卡爾‧德斯坦（Henri Giscard d'Estaing）就大有來頭。

據網上資料顯示，亨利嘅爸爸係前任法國總統戴斯唐。睇埋招股書，Henri九七年加入Club Med（法國地中海俱樂部，後於一五年被復星收購），並前後擔任Club Med財務主管、發展及國際關係首席營運官、執行董事會主席等，現時亦為復星國際全球合夥人。

君實創夢舵手稱霸文武界

以手遊起家的創夢天地（01119）亦唔弱，其聯合創始人兼總裁高煉惇唔單止打機叻，連打拳都好勁，事關佢係一位業餘拳手，雖然落場次數唔多，但聽講係贏多過輸㗎。

睇學歷嘅話，平安夜當日上市嘅君實生物（01877）有位李寧，運動叻唔叻就唔知啦，但肯定係個學霸。現年57歲的李寧，今年一月加入君實生物，擔任公司行政總裁兼總經理。

佢喺八四年同八七年分別獲得中國復旦大學上海醫學院公共衞生專業學士學位及醫療專業碩士學位，九四年八月仲拎埋美國愛荷華大學預防醫學博士學位，計吓數，即係33歲已經博士畢業！

之不過，要講到年輕有為，就一定非招緊股嘅申港控股（08631）莫屬，事關主席羅名譯今年只得30歲！唔講唔知，佢喺18歲嗰陣已經加入公司，埋頭苦幹11年，舊年十一月底先「坐正」。

申港主要從事柴油運輸，但奇就奇在羅名譯係讀室內設計出身，點解會咁有Heart？原來申港係羅名譯爸爸創立，要接管家族生意又點會無Heart呢？

余絲韻