絲絲講場：逾半港人想靠網搵食

社交平台嘅出現，造就咗呢啲「數碼化工作」嘅興起，根據宏利最新嘅投資者意向指數（MISI）調查結果，就發現每四個香港受訪者就有一個做緊全職或兼職「數碼化工作」，至於考慮緊參與「數碼化工作」嘅受訪者都有三成，即係總共超過一半嘅香港人，做緊或者諗緊加入呢個行列。

72%人感數碼工作夠靈活

調查顯示，喺已經從事緊或者有意從事數碼化職業嘅受訪者中，最多人想喺網上搵工或者接Freelance，有一半人就想開網店，32%人表示有興趣靠喺網上分享文字或者影音內容去賺錢，而有超過五分之一就希望能夠做到網紅或者KOL。

KOL做到八十歲不是夢？調查又的確發現，有成78%嘅受訪者話，希望退休之後繼續做「數碼工作」，例如利用網上平台拍吓片、經營網店、或者炒散賺啲外快。至於有72%受訪者都覺得，數碼科技增加咗退休後工作嘅可能性和靈活度。

事實上，呢啲「數碼職人」比一般打工仔嘅收入唔太穩定，對「數碼職人」嚟講積穀防饑就更加重要。

調查又指出，接近一半全職數碼職人擔心收入唔夠穩定，同無保險保障，而有62%嘅人就認為，因為收入變得唔穩定，更加需要儲多啲「彈藥」退休。不過，「有危先有機」，數碼職人因收入唔穩定，普遍更加積極關注理財同埋財務規劃，67%嘅全職數碼職人就希望有更多財務管理同投資嘅資訊同建議。

印印腳退休須儲15年人工

最後，呢個調查亦發現，香港人平均需要15.4年嘅現時收入，先足夠喺退休之後，維持退休之前嘅生活水平，但受訪港人竟然平均只係得2.9年嘅儲蓄，差成12.5年嘅收入額！

呢個儲蓄差額係亞洲區第二高，想臨老可以「印印腳」咁樣過好日子，就要快啲開始部署啦！

余絲韻