Market Insight：順住天氣變化 炒轉消費股

幾大重磅指標股猶如定海神針，股王騰訊控股（00700）、建設銀行（00939）、滙豐控股（00005）及港交所（00388）中，除騰訊剛好彈夠1%外，其餘幾隻升跌幅都在1%內，真係冇乜睇頭。

講真，就算中美貿戰停止升級90日，但相信唔到最後時刻，事件都好難有新進展。即使事件有新發展，都未知係向好定壞的方向發展。好似「華為事件」，近日中國反應強烈，禁止蘋果公司在內地發售部分型號iPhone，但事件暫對股市影響輕微。

波司登睇位跟進

其中近日獲大行唱好的舜宇光學（02382）更加絕地反擊，昨日升6.4%，並帶起板塊氣氛，好似瑞聲科技（02018）及通達集團（00698）分別升2.7%及2.4%。這亦間接道出市場雖然重視中美貿戰消息，但講到尾最重要都係睇吓有冇得炒。

板塊方面乏善可陳，反而過咗中國節氣「大雪」後，天寒地凍資金開始轉吼部分相關消費概念股，唔講其他，就簡單睇衣同食。近期波司登（03998）同申洲國際（02313）股價表現都唔錯，尤其是前者，股價自十一月初上破1.2元阻力後就拾級而上，昨日再升6.5%收報1.62元，已累升逾35%，真係唔講得笑。

從基本面分析，波司登截至九月底止半年業績，收入按年增16.39%至34.44億元人仔，盈利升43.92%至2.51億元人仔，毛利率增加2.2個百分點，各項數據增速相較去年同期均有所上升，表現唔錯。

不過，唯一要考慮的，乃集團股價已累升唔少，且往績市盈率達23倍的相對高水平，不過既然港股暫時無主題亦缺乏焦點，不排除資金短線繼續追勢炒上，不妨小注睇位跟進，目標價1.8元，跌穿20天線約1.41元止蝕。

海底撈夠晒應節

至於講到「食」方面，凍凍哋就最好去「烚下烚下」，古勝即時諗起隻海底撈（06862）。睇番海底撈上市後其實冇乜點炒過，近幾個月主要在17至17.8元水平浮沉，加上中美貿易戰對其業務打擊不大，且早前又有大行高盛首予「買入」評級，目標價22元，喺一堆因素聚合埋之下，破位後當然較易成為資金追貨對象。

走勢上，海底撈股價昨日單日升8.4%，係就係有點急，但亦反映出港股無乜股好炒，一旦成為資金焦點，隨時係升到你唔信。進取者不妨順勢上車，最多跌穿番昨日升幅一半即約18.4元止蝕，目標博升穿20元後進一步上望22元。

古勝