絲絲講場：小米攻按摩椅市場 鬥平
內地眾籌平台小米眾籌踩到去AI按摩椅市場，對手實有排震。小米眾籌近日上架咗一款摩摩噠智能AI全身按摩椅，主打體形檢測，私人按摩訂制，全身以氣囊包裹，零重力體驗等特色，眾籌價唔使八千蚊人仔，仲預計出年一月十五日起開始發貨。
靠高性價比響朵
屈指一算，眾籌價相當於坊間外國大牌字零售價格嘅一半左右，完全符合小米一貫性價比原則，價廉物美市場梗Buy，籌款已經超額一倍。
小米性價比一向好厲害，除咗小米早前公布，十月已提前達成今年全球售出逾億部手機嘅目標外，最近小米可穿戴設備喺第三季砌低蘋果公司（Apple Inc.）Apple Watch同Fitbit，成為全球出貨量第一，按年增長逾九成。
小米產品咁成功，竅門都係得一個，就係高性價比！唔知呢款按摩椅最終砌唔砌得低外國大牌子呢？
余絲韻