絲絲講場：碧桂園太子女升做聯席主席
今年蟬聯中國女首富嘅碧桂園（02007）太子女楊惠妍升職，升任公司聯席主席，負責協助佢爸爸楊國強處理日常工作，但人工就維持年薪1,500萬人仔。不過，楊國強未退休，會繼續做主席帶領同監督董事會運作。
助拓農業及機械人
根據資料，三十七歲嘅楊惠妍係楊國強二女，○五年加入碧桂園擔任採購部經理，○六年十二月獲委任執行董事，一二年三月做埋副主席。公司又讚楊惠妍領導物業管理服務分拆上市，對佢嘅工作能力高度認可。佢升職後，要睇埋新業務探索，例如幫助公司積極探索農業及機械人等領域。
事實上，楊惠妍當年加入公司後，楊國強已將自己所有股權轉讓畀佢，確認接班人身份。亦因為咁，楊惠妍憑手持碧桂園股權而多次登上中國女首富之位。
楊國強今年初被問到退休時，漏咗口風話自己都想，但阿女叫佢做多幾十年先！照依家咁睇，碧桂園盤大生意可能好快可以交棒喇。
余絲韻