Market Insight：氣氛好轉 有利港交所

昨日市況有幾點值得留意：首先，從內部睇，港股高開後即市再上動力唔係太強，惟主板成交確實增至1,296億元配合升勢，加上恒指重上100天線，為今年六月中以來首次，技術走勢偏好。其次，昨日中移（00941）逆市跌2.9%報75.35元，似暗示有資金從防守性股份轉移至較具爆發力個股身上。

順勢跟炒嚴控注碼

再從外部睇，中美暫時休戰消息在周日公布，道指期貨喺亞洲時段升逾500點。不過，未知周一晚美國總統「侵侵」又有冇嘢發表，因為大家都知，「侵侵」一向反覆無常，當投資者愈係睇得好，佢又會唔會一個「華麗轉身」話唔算數，咁到時就真係考大家反應了！

所以，咪話古勝唔提點大家，個市升就無話唔炒得，不過最緊要唔好過分進取，應嚴控注碼，萬一唔好彩中止蝕就要忍痛執行。

策略上，昨日資金主要湧入早前受貿易戰打擊較大的板塊，例如騰訊（00700）、出口股、航運股、手機設備股、內房股及金融股，未來能否有力製造全面上升漩渦，這個可能性不能抹殺，故已持貨者不妨睇長少少，等再升多浸先食胡。

正如在下早前所言，今轉可能係好友年內最後反攻機會，相信今浪唔會太短癮。至於當下仍手持淡倉重貨者，若見後市現整固，應趁機平倉，事關市場氣氛正在改變，港股短期內向上機會率始終較大，無謂同錢鬥氣。

另一方面，俄羅斯與沙特阿拉伯早前同意將減產協議延至一九年，同時加拿大阿爾伯塔省早前下令減產，以緩解該國能源業危機，加上石油輸出國組織（OPEC）等產油國將於周四開會，市場普遍預期達成減產協議機會率都幾大，故刺激早前急跌一輪的國際油價反彈。不過，卡塔爾忽然宣布明年一月退出油組，令周四會議增添變數。

中石化會略為輸蝕

「三桶油」昨日受油價帶動，中石油（00857）、中海油（00883）及中石化（00386）股價升幅介乎3至3.9%，考慮到前兩者在上游資產佔比較大，對油價相對敏感，不妨作為博反彈之選。

最後，港交所（00388）作為港股晴雨表，股價早前跌至低位200元樓下後率先帶領大市反彈，昨日再升3%收報235元，10天及20天線先後上破50天及100天線，技術走勢向好，同時更受惠股市交投轉旺。如果無心水，不妨簡單啲買港交所，目標價245元，穿10天線228元止蝕。

古勝