主板殼價勁劈三成

港股市況低迷,加上監管機構嚴厲打擊「殼股」買賣活動、內地嚴格控制資金流向,市場消息透露,近期公司上市地位價格(殼價)明顯下跌,主板殼價由高峰期逾7億元回落至低於6億元,個別開價更狠劈三成。創業板情況更嚴峻,殼價由逾3億元回落至只有約2.5億元。

有熟悉買賣殼股運作人士透露:「半年前主板殼叫價仲有7億至7.5億元,但近月已經回落至6億元,最近更有一隻科技股殼,開價低過6億元。」他又說:「以往殼主的要求多多,例如要對方有資金證明,見唔到唔會傾,但依家唔會有咁多要求。依家情況係殼主想賣都冇買家,就算多人傾但要成交到唔容易,或者要傾好耐,最少都要半年。」

驚遭除牌 殼主急求甩手

他又說:「賣得殼梗係公司生意做得唔好或者冇心機再做落去,但依家公司有機會被香港交易所(00388)因業務不足而除牌,再唔賣驚連渣都冇,所以都唔能夠再吊高嚟賣。加上近期內地資金好難走出去,以前啲買家會覺得愈買愈貴,但今時唔同往日,今日唔賣,聽日可能會仲平,內地買家都唔使再搶,情況同現時樓市有啲相似!」

另外,他表示:「有啲殼股會同埋一啲藍籌股抵押畀證券行做融資,一方面個倉(股票戶口)唔會單一持股,而且平時買賣下啲藍籌股,唔使變死倉之餘,賺到錢仲可以用嚟托下殼股個價,但依家連好多大藍籌都被沽到殘,加上股市下跌,上市公司市值大縮水,殼價跌自然不能幸免。」

創板僅嗌2.5億 無人吼

對此,立信德豪會計師事務所董事林鴻恩表示,近期買賣殼活動明顯收斂,買賣宗數減少。現時市場呈兩極化,創業板股份由於取消轉板簡化程序機制,吸引力大減,在需求及殼價上明顯減弱,以前叫價3億元,現時跌至僅2.5億元,即使價格仍有很大討論空間,但依然好少成交。

他又說,雖然主板殼仍有需求,並非有很大下行壓力,但成交宗數很少,「以往一個月都有一宗,但現時可能兩、三個月先有一宗,而且賣家態度軟化,始終依家經營上市公司的行政費用好高,加上條例收緊,導致持貨能力下降,唔想再花精神同金錢於上市公司,想盡快甩手!」

投資者學會主席譚紹興表示:「由於內地資金落唔到嚟香港,買家縮晒,依家主板淨殼價只有5億至6億元,計及資產約6億多元。至於創業板方面,以前係好多人買,諗住可以注入資產或轉板,但依家冇人想要。」

專家估計內地仍有需求

他又說,不少細價股的殼主會押股予財務公司,接近年底,部分中資券商的財務公司「收水」,個別殼主因「水緊」再「劈價」賣殼不出奇。他又直言,中資券商的財務公司追收孖展,加上年底計數,恐觸發細價股爆煲潮。

早前中國證監會已要求在港中資券商不可經營財務公司,已開展的不得再新增業務,現有項目則待合約到期後要結束,部分中資券商已計劃在今年底「提前」終止所有手頭合約。

不過,譚紹興認為,殼價不會長期低落,因為內地批出新股的數目仍不多,內地對香港上市公司的上市地位仍有需求,相信殼價只屬短暫回落。