Market Insight：中資航空股負面因素淡化

近期港股都幾難炒，就單睇隻騰訊控股（00700）就知。早前受國策影響「深潛」一輪後，騰訊股價十月尾跟隨大市抽過上300元樓上見303.8元，但之後就再次回軟落番去260元，近期只係在260至300元水平上落，未見大方向。

從宏觀面睇，如果港股要再上，權重股騰訊必須要有番多少動力先得。從日線圖睇昨日破腳穿頭，確係近期少見之象。不過，現價維持在上落區內，加上今期美股專攻擊高估值科技股，騰訊未必可獨善其身。

重磅金融股漸喘定

此外，港股要更上一層樓，除騰訊外亦要借助一眾中資及國際金融股回勇。睇見滙豐控股（00005）、友邦保險（01299）、建設銀行（00939）以及中國平安保險（02318）近期走勢確係有所改善，起碼十一月的低位暫時仍較十月低位為高，這是近幾個月少見之象，所以港股昨日未有再跟美股跌，其實都算有迹可尋。

中美貿易戰能否在G20峰會上有轉機，係未來港股關鍵，惟從美國總統「侵侵」打開口牌放過沙特一事上可見，佢作為一個商家出身，在利益關係前真係講乜都係假。如果再將此思維放在美國經濟上，今次油價下跌亦明顯係幫幫自己，事關油價回落對減慢通脹增速有直接影響，並間接拖慢聯儲局加息速度，且美國企業面對息口上升之嚴峻考驗亦自然有所紓緩。

當然，今轉油價回落，在港股上最傷的自然係石油股，而受惠的則為航空股。石油股原本沒有太多不利因素，不過「侵侵」出到聲話要油價跌，咁石油股自然要跟，「三桶油」股價昨日跌幅介乎1至2.4%不等，其中以對油價最敏感的中海油（00883）跌得最甘，跌2.4%收報12.72元。

石油股前景有顧忌

雖然高盛最新的研究報告指，早前參加中海油在珠海舉行的實地考察，對集團定位更為樂觀，主因集團的天然氣利潤增加，在南海的儲量及產量均有實質增長。該行又認為，油價下跌令股價回調，提供了買入機會，維持其「買入」評級，目標價16.1元。不過，集團股價自十月開始每況愈下係事實，前景未明下，都係無謂多手。

相對地，三大中資航空股早前受累人仔下跌以及油價急升所影響，股價以反覆向下為主，惟這兩大因素近期已見改變，股價未來能唔能夠重新振作就未知，但係都可以攞番出嚟望兩眼，睇睇後市有冇轉勢先再作部署。

古勝