絲絲講場：比特幣碌落4200美元 內地收買掘礦機斷斤秤
虛擬貨幣比特幣（Bitcoin）呢幾日暴跌，周三仲曾經失守4,200美元關口，即係低過「掘礦」成本，搞到內地爆發「礦難」，成班礦工竟然齊齊搬走部礦機，當廢鐵「斷斤秤」賣止蝕。唉！點估到虛擬貨幣一哥會應驗咗「一剎那光輝唔係永恒」呢句說話。
網民慘蒸發八成資產
話說比特幣早喺一星期之前仲維持6,000美元以上水平，但後來一直急跌。根據CryptoCompare數據顯示，尋日最低跌至4,142美元，即係一星期之內累跌超過三成。雖然到咗晚上七點半跌幅已經收窄至4,584美元，按日上升番4.31%，但絲絲睇見都「嚇到個心都離一離」!
望住自己啲資產突然蒸發，難怪成班內地礦工會掀起一場「賣鐵潮」，部分小型比特幣礦場嘅「廢棄礦機」已經堆積成山，再用回收廢鐵嘅價錢「斷斤秤」嚟賣。有內地網民形容，今次貶值潮令比特幣再次喺財經界「大放異彩」，亦有網民透露有八成資產已經人間蒸發，宣布「破產」。
泰達幣傳遭美國調查
但係今次比特幣暴跌，反而益咗俗稱「穩定幣」嘅泰達幣（USDT），因為佢嘅價格與黃金同埋美元掛鈎，市場急急腳搵避險貨幣止蝕，帶挈泰達幣單日交易量較今個月初突然暴漲1.5倍，至50億美元水平。
市場隨即傳出美國司法部已經展開調查，懷疑比特幣同埋泰達幣，存在不尋常嘅價格波動，可能涉及操縱問題。
余絲韻