周三晚美股喺中期選舉完結後大升，加上中國十月進出口數據優於預期，港股昨日高開344點，可惜動力不足，恒指最終僅升80點報26,227點，國指則升62點報10,703點，主板成交946億元，維持「牛皮氣」。
港交所（00388）剛剛出的季度業績幾靚仔，首三季純利按年增35.4%至74.8億元，創新高兼好過市場預期。港交所預期，明年將有逾250家企業來港上市，當中包括不少的科技和生物科技企業，睇落IPO條靚數可以延續。不過，國家領導人啱啱話要推出科創板，多少會擔心日後出現「搶生意」情況。
績後多間大行出報告唱好港交所，德銀報告指其首三季業績優於預期，故上調其目標價至245元；大摩則認為，港交所季度每股盈利高預期10%，盈利已變得穩定，予其目標價290元及「增持」投資評級。由此可見，大行睇法幾正面，難怪股價繼續跑贏大市。
走勢上，其股價企穩多條平均線上，短期若在大成交配合下企穩230元，中線應可更上一層樓，不妨小注跟進，目標250元，止蝕220元。
近日內銀股似有築底迹象，「中工建農」四大行股價無再級級落，但能否回升又係另一回事。當然，中央要穩經濟必須放鬆銀根增加資金流轉，人行年內數度降準，的確令內銀有能力去放貸。
不過，從另一面睇，若然中國實體經濟在貿易戰及人民幣持續貶值影響而走下坡，會令企業經營面臨威脅。最令古勝擔心的是，一旦內地經濟急速變差，屆時內銀的資產質素也同樣有轉壞壓力。即使內銀走勢有改善，但前景繫於內地經濟下，現階段實難以言好。
古勝