絲絲講場：小米賣得最貴 你估係乜？
小米（01810）喺香港區推售嘅最貴產品係……手機定電腦？No，賣得最貴嘅，竟然係投影機！
港投影TV輸畀內地單車
小米香港營運總監羅燕尋日介紹呢部米家激光投影電視，賣成13,999港元！雷軍董事長成日將「感動人心，價格厚道」掛喺嘴邊，今次價格一公布，難怪在場記者都「嘩」咗出來。羅燕就話呢部投影電視最大可以放大到150吋，非常抵咁話。絲絲諗，香港家居咁「大」，150吋，真係要諗吓點用到。
有樣嘢大家更估唔到，以小米成個集團計，最貴嘅產品係……生態鏈公司出產嘅公路單車，索價19,999元人民幣！貴在邊？絲絲都唔知，因為一早已經售罄了。
余絲韻