絲絲講場：進身富裕族原來好Easy

渣打銀行（香港）六、七月做咗項調查，訪問咗亞洲、非洲及中東地區11個市場內1.1萬位有儲蓄及投資能力嘅新進富裕族，香港以月入2萬至8萬港元為受訪樣本，內地則為月入1萬至4萬元人民幣。

搵銀力強 迅速向上流

香港新進富裕族當中，每十個有六個人（佔59%）喺社會階梯攀升，有6%係「上位」超迅速！「上位」全賴收入增長可觀，20%受訪者嘅薪酬過去一年增一成或以上，有18%於過去五年收入直頭增超過50%！

呢班香港新進，無論喺教育程度、職業、置業方面都較父母優勝。佢哋八成有大學學歷，相對佢哋阿爸同阿媽只有31%及27%。有超過66%擔任管理層或擁有自己生意，佢哋父母呢方面只有31%及26%。

八成有樓 勝過上一代

置業方面，兩代亦有差距，八成香港新進有自己嘅物業，佢哋父母只有68%已置業。呢個現象好自然，事關有46%香港新進以「有樓」界定「成功」，高出調查嘅38%平均數。關中國人傳統睇重「有田有地」事？未必。24%內地新進富裕族認為「有名牌奢侈品」先係身份象徵，超出平均數11%一倍！

既然自己叻過阿爸阿媽，呢班香港新進亦一定供硬仔女讀書？雖則有12%人以子女教育為首要儲蓄目標，但唔單止低於16%平均數，仲係咁多個地區中排尾二，叫做高過南韓嘅9%！

啲新進富裕族嘅下一代仲諗住「靠父幹」？睇嚟真係你諗你。

余絲韻