唔經唔覺「轉數快」將會喺禮拜日全面開通，銀行公會主席兼滙豐「一姐」施穎茵（Diana Cesar）仲曲線Sell「轉數快」可慳時間煲劇。
「轉數快」最大特色可全天候跨銀行即時轉帳，最啱絲絲睇戲、食飯夾錢用。施穎茵周五喺金管局主辦「轉數快」開通儀式致詞時話，外國研究指，消費者每年用32個鐘進行同現金相關嘅支付活動。大家轉用「轉數快」時慳出嚟嘅32個鐘夠煲32集《延禧攻略》、坐高鐵來回香港深圳68次。
除轉帳外，「轉數快」仲可掃二維碼（QR Code）消費。滙豐銀行同中銀香港（02388）已分別夥拍香港電燈（02638）同香港中華煤氣（00003），推出QR Code帳單繳費，市民用任何已參與「轉數快」平台嘅銀行或支付商手機App，即可輕鬆交費。中銀香港交易銀行部副總經理蘇夢麟仲話，佢哋已走訪400家商戶及機構，絕大部分商戶對新支付方式表示歡迎，睇嚟香港走向無現金城市又邁進一大步！
余絲韻