絲絲講場：鷹君爭產鬧到上差館
鷹君集團（00041）羅氏家族爭產風波由法庭鬧到差館，上年五月被Out出鷹君董事局嘅孻仔羅啟瑞，尋日透過公關發文指，自己喺鷹君總部嘅辦公室被擅闖，內裏物品被移走，並已報警求助。
羅啟瑞轟Office被擅闖
鷹君一方就話羅啟瑞唔再係執行董事或僱員，已喺今年三月要求對方遷出，期間使用辦公室理應收租，故向對方追討租金逾60萬元。
羅啟瑞喺新聞稿度講：「他們不合理地，夾硬移動我的私人物件。希望沒有任何法律上重要的文件受到損害或消失。」羅啟瑞一方又講，佢雖無做鷹君執董，但繼續擔任集團相關公司董事。一直沿用嗰個辦公室，鷹君無講過要收回，無爭議過係咪有權利用嗰度。
鷹君：天花滲水要維修
不過鷹君嘅新聞稿話，颱風過後，公司多處發現滲水，包括羅啟瑞辦公室天花位置，需移走房內物品維修，並一早通知對方秘書，希望處理房內物品，但遭拒絕。到尋日真係動工時，鷹君職員將一早已裝箱嘅文件移離工程現場，過程有監控錄影。
羅啟瑞尋晚回應話，鷹君主席羅嘉瑞唔應該又用租金同埋董事職位為藉口企圖轉移大眾視線。
鷹君創辦人之一羅杜莉君告滙豐國際信託案件未審完，今次又發生呢件事，雙方版本各有不同，唔通又要攞上法庭主持公道？
余絲韻