絲絲講場：港交所返主場搞LME研討會
香港交易所（00388）由交易大堂改裝成嘅金融大會堂，自今年初落成後使用率愈來愈高，業界亦好鍾意租嚟搞活動，港交所都唔執輸，明年五月舉行嘅倫敦金屬交易所（LME）亞洲年會金屬研討會，亦一改喺會議展覽中心搞嘅慣例，首次返自己「主場」搞！
自港交所一二年底收購LME後，明年已係第7屆搞LME亞洲年會，多年來喺會展嘅研討會門票係每位1,700港元或220美元，包入場費、自助午餐及茶歇。咁明年研討會喺「主場」度搞，理論上唔使捱貴租，唔知門票會唔會收平啲？
至於LME亞洲年會「重頭戲」晚宴，就照舊喺會展舉行，事關起碼要擺150圍，就算金融大會堂有咁大，港交所都冇咁大個廚房。
金融大會堂勁多人租
雖然立法會議員張華峰曾呻話金融大會堂租金貴，但愈來愈多人租喎。好似上星期咁，就最少有3單活動租場，包括金融服務界酒會、董事學會研討會，同香港綠色金融論壇。下個月20號，金發局嘅就業資訊日亦喺金融大會堂度搞啦！
余絲韻