Market Insight：後市方向仍有待明朗

不過，有一點可以肯定，就係今個月得番三個交易日，以恒指周一收市價27,499點計，要反彈上27,888點樓上，就可以將月線圖上的「四連陰」逆轉，計一計數即係要彈番389點，話多唔多話少唔少。不過，考慮到20月線現處於約28,106點，如果真係彈唔番上去，咁港股後市都係級級落多。

比亞迪低位見支持

若然從恒指牛熊證街貨數據睇，大家或者可從中得到啟示，基於港股反彈逾千點後，現時資金再追入牛仔的信心已下降，27,000至27,300點左右的街貨量只係相等於2,147張期指合約，至於熊仔在28,000至28,300點亦都有2,937張期指合約，似乎大戶短線做好定做淡，機會亦一半半。

既然指數都係飄上飄落，咁不如轉吼個股睇睇有無運行。上周反彈的汽車股，周一普遍見獲利盤湧現，惟古勝日前提及的比亞迪（01211），周一即市股價雖曾落到52.2元，但尾市跌幅已收窄至0.09%報54.75元，反映低位有資金買貨，既然大弱市都顯現承接力，未入貨者不妨吼個靚位上車。

另一方面，內房股受累市場傳出內地將對樓市進行新一輪調控，碧桂園（02007）、中國海外（00688）、華潤置地（01109）及綠城中國（03900）股價跌幅介乎3至6.2%不等。

此外，連帶與內房唇齒相依的物業管理股都要跌埋一份，彩生活服務（01778）就跌得最甘，全日跌6.6%，綠城服務（02869）及中海物業（02669）分別跌5.3%及4.2%，至於一向表現較硬淨的碧桂園服務（06098）則跌3.9%。

物業管理股焗陪跌

由於今次兩個板塊之跌勢，乃大市加上行業氣氛使然，故短期會唔會再跌仍屬未知數，如果未有貨都係先靠邊站最穩陣。

此外，周一見唔到近期在大跌市中都有資金湧入的公用股作反擊，好似中電（00002）、中華煤氣（00003）及電能實業（00006）都同樣微跌，加上一向防守力唔錯的領展房產基金（00823）近期破位而落之後，都一樣彈唔起，咁究竟係大戶夠淡定抑或周一只不過係借機殺一轉好倉後會再推番上去？相信好快就會有答案，大家不妨拭目以待！

古勝