絲絲講場：港星賓架行徑鬥騎呢

泰應酬一晚使17萬被炒

有位獅子行前賓架爆料話，奇聞通常來自行家去東南亞地區出嘅Trip，試過有行家去曼谷公幹，返嚟向公司開十七萬幾港紙嘅「客戶娛樂費」！無論呢位行家幫客管理嘅AUM（資產規模）勁成點，但對於呢間傳統歐資銀行，大拿拿十七萬One Night in Bangkok嘅Bill實在啃唔落，結果嗰位行家最後要執包袱。

有位駐香港嘅國際投行結構產品部賓架就自爆，着錯衫可以有幾瘀。佢一般唔使點對客，所以平日着得Casual少少，短袖恤衫、斜布褲就算。點知有日忽然要佢見客，佢走遍全層樓叫做撲到條呔戴下，但配搭出嚟個Look實在……結果同事介紹佢時，當住客面當講笑話佢剛由老麥跳槽過來，瘀爆！

名校生返工時間勁任性

而忽然Dress-up亦有機會瘀爆。有位前盤房交易員話，佢以前有個同事平日衣着隨便到好似喺屋企咁，忽然有日下晝執到正，全套黑白幼間西裝，幾乎成Set禮服咁現身公司！上司爆笑問，秘秘密密去完社交舞考試返嚟呀？對方答「剛去完阿嫲葬禮」，個個即刻唔識笑。

所謂「騎呢無極限」，只係你未曾體驗。話說有位賓架請咗個名牌大學生，開頭好正常，但無耐唔到10點唔現身，有時下晝仲唔見人。賓架問佢搞乜，佢竟然答，「返學時個個都係咁，唔覺有咩問題喎。」以上情節，全屬真人真事，如有雷同，實屬貴行嘅不幸。

余絲韻