絲絲講場：專家：幫子女買樓要「3」思

1.養成依賴習慣

各位父母，須知道仔女唔再係中小學生，需要學會財政獨立之餘，更需要明白「粒粒皆辛苦」嘅道理。仔女收入低、儲唔到錢、開支高昂，所以唔能夠儲首期？問心會唔會係藉口先，難道父母嘅錢係由天跌落嚟？父母幫兒女上車無可厚非，但要提防咁會令兒女養成依賴習慣。可以嘅話，必須事先向仔女表明只幫一次，供款靠佢哋自己喇。

2.仔女唔識理財

父母無償咁喺財務上幫助已成年嘅仔女前，或忽略咗咁可能係「害」咗佢哋，就好似有人中咗六合彩，反而搞到破產咁，主因係錢或上車機會得來太易，仔女就唔曉珍惜。所以父母要狠心等啲仔女從錯誤學習，逼佢哋學懂理財及明白錢得來不易，驗證咗佢哋唔係「月光族」後先幫。

3.打亂退休部署

作為父母，幫仔女上車好「應份」？不妨倒轉諗，老咗時，仔女能照顧番你哋嗎？相信好多父母都唔想令仔女有負擔，但若瞓身將所有血汗錢幫仔女上車，會否打亂自己退休部署？仲有冇餘錢養老呢？故此父母幫仔女前，必須衡量自己係咪有足夠錢過老，否則將來反會拖累兒女。

余絲韻