Market Insight：中資券商股有得博

話說回頭，如果A股真係回勇，咁即係過去幾個月拖住港股後腿的主因亦消失（大家睇睇美股依然強勁！）。加上從今輪中美雙方出手「留有餘地」角度睇，貿易戰到美國中期大選即十一月初前，出現急速變壞的可能性減低，照咁推斷，港股短期會繼續彈亦唔出奇！

熊市投機要識抽身

當然，都係嗰句，現時港股仍處熊市，博反彈係可以，但記得注碼要嚴控之餘，一見勢色唔對路就要快夾狠地撤退，因為熊市反彈來得急時，去時亦一樣可以快到無影！

睇番昨日多個板塊都有得升，例如昨日提到的基建鐵路及水泥股都發力再上。不過，講到最醒神當然係汽車股，事關外電報道德國福士汽車計劃電動車進行量產，刺激歐洲汽車股上升，而在港上市的汽車股股價累跌多時，估值開始重現吸引力，其中長城汽車（02333）主席魏建軍增持股份，為集團投下信心一票，昨日股價幾乎由頭帶到尾，最終升11.8%收報4.99元，強勢畢呈。

雖然話汽車行業係中美貿易戰主要受害者之一，加上內地早前放寬汽車業外資持股限制及調低進口關稅，令本土汽車企業競爭有所加劇。不過，從估值考慮，長汽及廣汽（02238）等往績市盈率已分別回落到7.3倍及5.3倍的吸引水平，資金見有靚位，短炒一轉亦合理。

策略上，長汽股價昨日一舉上破20天、50天線及中期降軌阻力，走勢明顯好轉，不妨搭轉順風車博見100天線約6元水平，止蝕位4.5元。至於廣汽，股價早前守穩6.9元水平支持後近日再度發力，昨日升3.4%報8.04元，短期有勢挑戰前高位8.68元，可小注跟進，跌穿7.6元止蝕。

比亞迪升勢應未完

此外，早前有消息指全國政協經濟委員會調研組正就新能源汽車產業發展情況進行調研，市場憧憬未來有新能源汽車的利好政策出台，電動車龍頭比亞迪（01211）同樣有氣有力，昨日升8.2%收報52元，難得上破50元關，升勢應有餘未盡，下站睇56元，以收市跌穿50元止蝕。

大市反彈，當然可搵權重股落手，中央未來真係有維穩措施的話，必然要推一推中資金融股，內銀可作為中線之選，但必須要有升得比較慢的心理準備。另外，若然股市轉好，做股票生意的券商股亦有機炒一轉，當然這類股唔知幾時先落鑊，但勝在快上快落，加上板塊坐冷板多時，有心人要炒上相信唔難，同樣有留意價值。

古勝