絲絲講場：全球十大黑仔股 騰訊居首

股價較高位冧32%

截至周三止，騰訊較今年初已累挫約22%，市值則蒸發約1,080億美元（約8,424億港元）。回顧今年一月，騰訊曾創下476.6港元年內高位，締造了自二○○四年上市以來累升逾640倍嘅神話。不過，之後好景不常，股價拾級而下，若與年內高位比較，騰訊累跌逾32%，市值更蒸發咗1.47萬億港元。

講真，騰訊近期真係幾黑仔，負面消息多籮籮。好似尋日，有外媒爆料公司旗下嘅騰訊音樂赴美上市集資額減半至20億美元；然後，內媒又話，網上流傳騰訊旗下《絕地求生：刺激戰場》和《絕地求生：全軍出擊》兩款吃雞遊戲，拎唔到版號已成定局，即將被勒令全面下架。幸好，騰訊其後回應有關消息都係謠言。如果唔係，公司股價又會被借勢做淡。

然而，分析員仍未「放棄」，平均給予騰訊嘅未來12個月目標價達451.1元，較現水平有大約40%上升空間。

百威三星齊入「三甲」

至於以上十大最令人失望股份榜中，除了騰訊，全球最大啤酒生產商百威英博及三星電子年內表現亦令人失望，排第二同第三位，今年股價分別累跌約17%及13%。