Market Insight：吼基建股 中交建追落後

昨日的升市有兩點最值得留意：首先港股「跟A股走」的趨勢明顯，基本上午後之升勢主要受內地股市帶動，這從滬綜指三點收市後，港股便無力再上。其次，無論是A股還是港股，兩地股市成交都唔見大增配合，就算滬綜指成交增至1,130億元人仔，但與高峰期甚至七月尾出現反彈時的成交相比，仍然唔算多。

資金炒作講求速度

始終，港股A股化下，市場炒作風氣改變，股份落鑊時間愈來愈短，且即市被市場氣氛影響力愈來愈大，故近日鮮見有板塊可以炒作持續一段較長時間之餘，一旦炒風退卻，股份回調速度亦可以既快且狠，若然走避不及隨時偷雞不成蝕把米。

簡單咁講，就係仍在港股上炒作的資金已愈來愈短癮，甚至有點純賭的味道。再考慮到成交日漸縮減，相信往後如果仲想在港股搵食，唔多唔少要睇實A股動態，以及研究一下如何在如此飄忽的市況中部署投資策略。

近期新經濟股無晒鑊氣，反而部分舊經濟股有啲起色，好似基建股及水泥股昨日表現都唔錯，皆因市場憧憬中央政府會再谷基建投資以抵銷貿易戰影響。中國中鐵（00390）、中國鐵建（01186）及中國交通建設（01800）昨日分別升7.5%、6.3%及6.9%。

雖然市場有憧憬，但要留意的是，中鐵同中鐵建股價其實已升咗一段時間，反而中交建股價昨日才剛剛起步，全日升，並一口氣重上10天、20天及50天線，上破八月初至今下降軌阻力，MACD初現牛叉，成交增加配合，走勢明顯改善。

再睇埋集團往績市盈率僅約5.1倍，相較中鐵及中鐵建的8.9倍及6.9倍吸引，現價追入博重上8.7元水平，跌穿20天線約7.6元止蝕，回報與風險有數得計。

水泥股吸引力稍遜

至於水泥股，就因為受多個地區水泥價格大升刺激，海螺水泥（00914）、華潤水泥（01313）及中國建材（03323）股價分別升4至7.3%不等，而亞洲水泥（00743）、金隅集團（02009）及西部水泥（02233）升幅則介乎3至6%，惟考慮到水泥股近年升勢都好飄忽，炒風有時更一瞬即逝，加上近日整體走勢都唔算太靚仔，所以如果要博，都係揀基建鐵路股較穩陣。

古勝