絲絲講場：香港奢侈品唔再抵買？

瑞士寶盛銀行出亞洲財富報告，比較同一款卡地亞Love Bracelet於亞洲11個城市不同價格，去睇各地奢侈品市場走勢。今年結果係，香港輸畀吉隆坡，失落奢侈品購物天堂地位！

上海進口稅高 賣最貴

香港唔夠人爭，主因物價漲，而吉隆坡物價又大跌，雙重影響下先咁樣。不過該行話，雖然香港加價加得最勁（9.5%），但仲係亞太區第二平嘅！

至於賣得最貴就繼續係上海，隻手鐲賣48,143美元，吉隆坡只係賣41,818美元，即貴咗15.12%。報告話上海高端珠寶賣咁貴，皆因進口關稅達40%。

不過貴還貴，內地人視高端珠寶為投資工具，喺全球經濟波動市況下用嚟分散投資，所以消費好勁，舊年內地呢方面嘅銷售按年增6.6%至149億元人民幣。

呢啲內地高資產淨值人士（即有100萬美元或以上可投資淨資產）嘅強勁需求，帶挈香港珠寶拍賣，過去十年香港珠寶拍賣總價值已由○八年嘅4.5億元，增至舊年嘅14.6億元，多兩倍幾！

余絲韻