Market Insight：聯想估值低小注一試

古勝不時提及，熊市亦會有反彈，但從近期港股陰陰落來看，短期似乎繼續級級落的機會，多於急插一轉再反彈。

講真，中美貿易戰一日未解決，資金從人仔流入美元資產的趨勢料持續。大家不妨睇睇人民幣兌每美元中間價已連跌三日，昨日續跌58點子報6.8546。加上滬綜指昨日即市曾低見2,647點，與一六年初熔斷低位2,638點僅一線之差！

另一邊廂，美匯指數繼續守穩95水平，再睇埋美國十年期國債孳息率不經不覺又爬上2.96厘水平，未來一旦觸及3厘，隨時又觸動市場神經，不利風險胃納。咁計計吓，港股又點會好樣。

國家隊出手效力短

講開又講，以往內地股市跌至某一個點，就不時有國家隊出手維穩，可惜根據過往經驗，短期稍稍有支持後，最終又回復舊觀，重返低迷狀態。大家不妨睇睇滬綜指自○六年至今的月線圖，呈現兩個如L形的趨勢，就清楚今次如果A股再穿底，內地股市以至經濟會有幾大煲。

近期中央的政策影響各行各業，國務院總理強調食品藥品等涉及人民群眾生命安全的領域必須更嚴格監管，致醫藥股及食品股受挫。

兩隻藍籌中國生物製藥（01177）及石藥集團（01093）昨日分別跌14.3%及9.7%，復星醫藥（02196）挫7.7%，藥明生物（02269）跌4.9%，金斯瑞生物科技（01548）瀉5.6%，似乎醫藥股又再被洗倉，短期都係博唔過。相對地，食品股今轉似係陪跌，華潤啤酒（00291）跌7.2%，康師傅（00322）跌5.8%。

港股勢頭不對，資金紛紛再流入公用股避避，中電控股（00002）及中華煤氣（00003）分別逆市升2.3%及0.9%，而港鐵公司（00066）就最威水，升2.5%。不過，無論係基本面定技術分析，都係前兩者較穩陣。

首季業績成功扭虧

另外，聯想集團（00992）自早前公布截至六月底止首財季業績扭虧為盈，轉賺7,704萬美元後，股價就級級上，若以七月起步位約4元計，昨日收報5.45元，已累升約36%！

大行於業績公布後普遍上調聯想目標價，中信里昂、交銀國際及花旗給予的目標價就分別為6.68元、6.1元及6元，與現價至少仍有一成水位。

從基本面睇，集團期內個人電腦（PC）業務重返全球市佔率第一位，有望重返正軌，加上資金短期傾向揀估值偏低的股份出擊，若想小注一試，目標先睇6元，穿5元即止蝕。

古勝