絲絲講場：南韓紅爆兒歌 唱出12億市值
多得一隻兒歌，有隻南韓教育股嘅股價，個幾星期就飆升逾七成！呢隻就係熱爆海外嘅南韓洗腦兒歌《Baby Shark》，上月底入咗《英國單曲排行榜》Top 40，依家上到第32位，唔單止係有史以來第一隻入榜嘅南韓兒歌，仲帶挈埋佢嘅出版公司Samsung Publishing嘅股價由月底至今爆升73.91%，公司最新市值去到近1.6億美元（約12.48億港元）。
雖然公司名有Samsung呢個字，但聽講同出手機嗰間三星係無關係嘅，呢間Samsung Publishing專營出版及網上教育業務，股份喺南韓上市。
今次多得佢哋間相關公司Smart Study兩年前將隻十幾年嘅「老」兒歌，重新包裝成有埋細路邊唱邊跳嘅MV，之後就喺網上爆紅，個MV嘅收睇次數已逾16.7億次！喂仲唔搵嚟睇？Baby Shark，Doo Doo Doo Doo Doo Doo！
余絲韻