被踢出藍籌（恒指成分股）就股價冧無人吼？要睇間公司係咪本身管理不善，唔掂嗰啲咪繼續酸溜溜囉。
至於爭氣嗰啲，好似聯想集團（00992）由五月被宣判剔出藍籌至今，股價升咗逾40%；去年被剔出嘅昆侖能源（00135），今時同佢做藍籌嗰五年比，亦可謂兩個樣，唔單止早排中期業績靚仔，富瑞仲出報告大讚公司改善咗，又與分析員溝通多咗。
據寫報告嗰兩位富瑞分析員講，昆能以前只會間唔中揀幾個Sell-side分析員（即係寫大家平時睇開嗰啲大行報告嘅人）上公司閂埋門嗲，但上月底嚟個大改革，公開邀請分析員去酒店宴會廳，坐滿Sell-side同Buy-side（即係基金內部）嘅人，現場人好多，遲嚟分分鐘要喺門外聽。富瑞又話，昆能今次匯報業績仔細好多，仲首次公布天然氣毛利係幾多錢添！
睇番昆能當年仲係恒指成分股期間，奈何國際油價暴跌，一三年公司又大地震，短短四個月內兩名主席相繼離職，結果做藍籌期間股價累跌超過58%，傷咗唔少投資者嘅心。不過自舊年十一月被宣判剔出藍籌後，股價至今反而升咗近18%！
講番上月個分析員會議，富瑞話出席者個個都「Wang Chung tonight」咁話！Wang Chung係隊八十年代嘅英國組合，最出名隻歌就叫做《Everybody have fun tonight》，明冇？
余絲韻