絲絲講場：賣涼茶用大數據睇面色Sell

中式草本產品零售商鴻福堂（01446）最近推出售賣機，結合IBM Cloud技術開發嘅人工智能互動功能，鏡頭可以分析人嘅面色，根據時節、氣候向顧客推介合適產品，唔鍾意就自己揀過第二樣。

部機操作好似一般售賣機，不過多咗個鏡頭，買嘢前對住鏡頭笑一笑，部機就會根據客戶嘅面色推介產品。咁咪會記錄晒客戶啲樣？放心，公司明白私隱重要性，唔會留底！不過絲絲就好奇，化妝化到靚一靚嘅話，部機又點睇呢可？

擬開無人店 鴻福堂搵緊舖

公司總經理兼執行董事司徒永富透露，智能售賣機係同人合作，硬件投資約5位數字；大數據等軟件投資又另約6位數字，預計每部售賣機每月開支約5,000至6,000元。現時約10部售賣機主要放置喺寫字樓大堂、門店，希望嚟緊可以補足現時實體店。

佢仲自爆公司有個願景，期望今年底喺香港開設集團首間無人店！依家物色緊地方，主要考慮該區對電子支付及無人銷售嘅接受能力，預計以十萬元計投資，不過運作成熟後，資本開支會比實體店開店成本約80萬至90萬元為低。

除咗籌備開無人店，佢仲話公司今年上半年開咗6間新店，下半年至少開多3間，主要位於港島區，全年目標開店10間。目前公司全港有116間門店，預計今年門店會維持約120間。

余絲韻