孖妹S檔案：券行掌門人 逆市搵「錢」路
港股跌到殘，唔少投資者身家縮晒水，若然連份工都無埋，想唔做阿愁都唔得。最近，銀行零售證券業務不斷萎縮，孖妹勁驚呢個係警號，經紀們將飯碗不保。到底券商依家係苟延殘喘，定等緊捲土重來，當然要問問老行尊。
張：股壇老行尊 張天生
藺：智易東方證券行政總裁 藺常念
Gilbert：鴻昇證券董事兼總經理 張益祖（Gilbert）
許：耀才證券行政總裁 許繹彬
行業趨勢 伺機推優惠 盡吸銀行客
彩兒：股市逆轉，依家做證券行業確係唔易捱！
Gilbert：證券業難做，人工貴，租金又貴，所以考慮到成本效益，銀行都逐步收縮零售證券業務，仲開始減省相關人手添。
Kitty：點解銀行咁輕鬆，話縮就縮？
許：證券業務本身就唔係銀行嘅主業，佢哋嘅主業係私貸、定期及按揭等。
彩兒：券商又點呢？等執包袱？
許：我哋把握時機吸客。客戶只要拎住銀行及其他證券行嘅戶口單據嚟我哋公司開戶，就有額外一個月免佣。耀才目前平均每日有400位新客戶，當中一半都係銀行客轉過嚟。
證券零售業務競爭更激烈，但券商具獨有優勢。券商專注買賣股票、期貨及期權等。其做孖展成數一般高啲，買賣亦靈活啲，可以同日沽貨並再入貨，但銀行則要T+2，即資金要喺交易日後第二個交易日先可以動用。
Kitty：你對公司未來充滿信心？
許：當然！公司客戶數量持續增加。公司亦打算增聘人手，當中大部分為前線員工。
輝煌時期 九七最好景 做到趕客走
Kitty：港股自今年二月起跌極唔停，難怪個個都話要冬眠。
許：公司生意明顯唔及上年。
張：回想當年……八七年十月，港股登頂見3,968點，十月十六日開始大跌，二十至二十三日停市四日，好恐怖！好多券商因持大量好倉，又無套戥，導致損失慘重。
彩兒：相信都有風光嘅時候。
藺：九七年係最光輝，全城炒風四起，港股屢創歷史高位，恒指於八月七日一躍而上至16,820點。一個牌有三部機，銀行都係得三部，所以銀行接唔晒啲單都流晒去券商。經紀有好多客，電話接唔停，日日做到夜晚11點都做唔切，最尾仲趕客走。但緊接住亞洲金融風暴衝擊，十月廿八日恒指跌至8,775點。
一牌多機制打擊收入
Kitty：短暫風光……
藺：第二輪風光時刻係○○年，全球興起科網熱潮，多隻殼股爆升，有啲更一日升十倍，突然出現好多暴發戶。
彩兒：聽聞之後因美國網絡股大跌，引發科網爆泡，港股都急跌。
Kitty：事隔一年，仲有911恐襲，真係雪上加霜。
藺：喺○三年，周文耀出任港交所行政總裁後，引入一牌多機制，即一個經紀牌可有多個股票交易終端機，券商客似雲來嘅景象就消失。同年取消最低經紀佣金制，證券行嘅客源及收入就進一步減少。眼見部分辛苦儲番嚟嘅客都轉戶去免佣金嘅券商，但我哋又唔可以跟住做，100元一單刁真係蝕本。
Kitty：今次跌市，分行咪拍烏蠅？
Gilbert：我都同客講，依家少做少錯。
藺： 天長地久有時盡，此恨綿綿無絕期……
彩兒：大師，何以咁傷感？
藺：股市跌到癲，有感而發，股市真係好難賺錢。我賺嘅錢多數嚟自物業投資，而唔係炒股。
彩兒：跌市梗係難賺啦。上年升市，聽聞你都幫客人賺到笑。
藺： 係嘅，有個客畀300萬元我，我上年幫佢買瑞聲科技（02018）及騰訊控股（00700）等，賺到近千萬元。
生存之道 中資湧港上市 C組獲救
張：投資者同經紀紛面臨考驗。自一四年滬港通開通，大媽追入港股，投資難度高咗。然而，零佣金出沒，經紀要諗其他計仔賺錢。
Gilbert：經紀工作性質唔同咗。以前經紀由交收實物股票，推車仔運大疊股票畀買家，到出市，一步步做，但依家經紀唔可以淨係識聽電話，齋賺佣再無肉食。
藺：喺○六年時，股市暢旺，經紀生意唔算差，用平佣吸客嘅經紀少於十分之一。但○八年股災，加上互聯網發展迅速，肯減佣、俗稱「折扣經紀」嘅數目就爆升七成，令小型券商難生存，C組佔比大跌。聯交所參與者入面，港交所會利用每月成交額分佢哋做A、B及C組，成交頭14位嘅券商係A組，15至65位係B組，第65位之後就係C組。
藺：若將交易量同佣金攤分於各組，C組一早蝕本倒閉，但仍捱得住，都係全靠中資湧嚟香港上市，券商幫佢哋批股及發債賺錢。
Kitty：撈埋資產管理呢？
Gilbert：券商一直有做證券交易、資產管理及分包銷等，所以稱唔上轉型。最多係控制成本，如精簡人手及控制租金成本。若公司舖屬於老闆自己，就輕鬆得多。
藺：好多券商屹立不倒，係靠做孖展。
期指上場 行業致命傷
彩兒：經紀行業嘅致命原因係咩？
張：我認為係期指上場，因唔少香港小型證券行都無足夠資源請夜班，就白白睇住客戶流失。
彩兒：你應該係指八六年，當年推恒指期貨，九三年再推恒指期權。
Kitty：經紀確有價值！好似老行尊張生，有大批熟客跟佢炒，眼光一定唔錯。
張：過獎！我揸住第1類證券交易，第2類期貨合約交易及第4類就證券提供意見。我咁多年都同客講睇好恒生銀行（00011）。
我嘅客戶亦係我嘅好朋友。做呢行最緊要係個信字，以前邊有話將經紀同客戶交易對話錄音，大家一向牙齒當金使，客戶話咗入幾多貨就唔會走數。我做咁多年，無同任何一個客人拗過數。
希望香港交易所（00388）及證監會繼續做好把關，嚴格審批上市公司申請人，保護投資者利益。我最驚啲公司唔掂，累投資者輸錢。情況就似演唱會買飛，一定要安排妥當，大家先可開心追星。
經紀前途 勤力轉數高 年薪幾百萬
彩兒：做經紀，仲係咪老少咸宜？
藺：唔建議年輕人入行！
張：年輕人最好先學做分析，再做銷售。
藺：經紀係夕陽行業，遲早被淘汰。要入行都入保薦人公司幫中資搞上市，或者做財務顧問及資產管理等。若炒股叻，做基金經理都得。
Gilbert：我哋公司一直請高學歷員工，咁先畀到Vision客人。喺沙士時期，唔少名牌大學生嚟應徵，但依家明顯減少。惟名牌大學生喺股場上未必係最叻個批，所以咩大學出嚟唔重要，只要有高邏輯思考能力又勤力，就有機會做得好。
新人浸數年可博做RO
彩兒：證券行員工流失率高唔高？
Gilbert：後生嘅平均會做三至四年。當佢哋慢慢熟悉證監規例，都可以擔任證監持牌嘅負責人員（Responsible Officer，簡稱RO），每間公司一般要有兩位。賺得多定少，都係睇自己功力，幫唔幫到客戶賺錢。依家嚟講，經紀若表現差，人工隨時低過揸綠Van司機。
Kitty：仲有無機會魚翅撈飯？
藺：若你夠勤力，年薪幾百萬元，唔係無可能。
彩兒：老牌經紀呢？
張：我已80歲，仲求啲乜？加入六福金融，都係搵地方打躉。我唔再收新客，唔想有太大壓力，新客留畀後生。我其他經紀朋友多數自己炒埋一份。另若間舖屬於自己，唔使交租，財政壓力減輕，應該仲捱到。
Kitty：見證證券業興衰，你有無後悔入行？
張：無後悔。做經紀未試過憂愁。我紅褲仔出身，經歷股場六十年風雨，七○年係最好嘅年代！
Kitty、彩兒