Market Insight：恒指新貴 申洲炒上落

外圍市場風高浪急，最慘係美國總統「侵侵」似乎覺得未夠亂，一方面向日本擺出強硬姿態，另一方面仲話預備再向總值2,670億美元之中國貨品徵收關稅。就算蘋果公司向華府進諫，話貿易戰恐令產品成本上漲，但「侵侵」卻反建議企業回歸美國生產，睇怕中美貿易戰在十一月中期大選前都好難搞得掂。

港股熊市似避無可避

港股基本面已夠差，就連技術走勢亦一樣。以恒指上周五低位26,669點計，已一度失守自高位回落兩成的「技術熊」死線約26,787點，幸尾市跌勢回順，恒指最終跌1點報26,973點，但本周又會唔會咁好彩守得住？此外，大家唔好睇當日成交增至1,105億元似乎可以支持港股，其實係因為藍籌股「執位」，帶挈大市成交增加而已！大家千萬不要表錯情。

講起執位，藍籌新貴申洲國際（02313）及中國生物製藥（01177）上周五分別跌1.2%及2.1%，現階段仲買唔買得過呢？先睇申洲，上半年多賺21%兼增加派息，但期內收入僅增至91.6億元人仔，表現不過不失。大行普遍於業績後出報告力撐，大摩認為，申洲上半年收入雖低於預期，惟純利勝預期，重申其「增持」評級，目標價115元；高盛則維持集團「確信買入」名單，目標價同為115元。

另外，大和、德銀及花旗皆予其「買入」評級，目標價分別為108元、105元及110元，似乎大行睇法都幾睇好。

走勢上，申洲股價八月二十八日一度上破早前橫行區90至100元頂部阻力，曾高見105元，可惜上周四隨大市破位而落，周五再跌多少少收報96.95元，除非短期內可在成交配合下重上及企穩100元關，否則重返橫行區內上落機會唔細，建議未破位前在區間內短炒上落。

憂加息 勢拖低地產股

相較下，中生製藥無論係走勢定基本面都較弱，股價一浪低於一浪勢頭明顯，且醫藥股早前曾被洗倉，加上國策存在變數，前景較難預測，似乎值博率較遜，故二選一，似乎都係申洲較值博。

另外，市場開始憂慮香港即將加息，對息口敏感的本地地產股氣氛明顯轉弱，恒基地產（00012）及新世界（00017）上周五均創52周新低，而新鴻基地產（00016）亦穿咗位，長實集團（01113）算叫做較硬淨，不過亦唔見大彈誘因。既然如此，如果手上無貨，奉勸大家無謂多手。

古勝