孖妹S檔案：8個股友8段激戰回憶

投資原則：小注入市控制風險　主攻收息股 揸住三層樓

馮：散戶 馮先生

馮：我投資好穩陣，買嘅股票主要係收息股，如領展房產基金（00823）及港鐵公司（00066）。兩隻股票都係抽番嚟，揸到依家。至於股價升跌，我唔係好理。我買股從來唔瞓身，投資額只係10萬至20萬元。我買過保本及債券基金收息，亦做過人民幣定存，不過唔好彩蝕咗少少，跟住就即止蝕離場。

馮先生	王善行	陳志強稱，投資股票必須細閱公司年報。

Kitty：有冇投資物業？

馮：有自住樓，同埋內地有間面積過千方呎祖屋，一直租畀人，每月收租2,000元人民幣，唔算好賺，都係博收購。十幾年前，幫囝囝買入元朗新田村屋，買入價120萬元，依家市值400萬元。

投資原則：無買股票運，就應該收手　玩股輸到怕 炒Yen賺幾萬

梁：散戶 梁先生

梁：幾乎次次買股票都輸，自覺無買股票運，所以我就再無買。不過，我有炒日圓，過去賺到幾萬元。我估計美元兌日圓見120時，又會係入市時機。

彩兒：你幾滿意自己過去嘅投資成績。

梁：OK啦，比起投資物業，成績仍差一大截。

Kitty：你覺得目前都係買樓最賺？

梁：我預測樓市短期內會調整一成，但長線有內地人追捧，樓市都係會升。不過，若年輕人要夾硬上車，我會戥佢哋心痛，咁樣對於佢哋嚟講太吃力，亦太困身。聽過有外國富豪將物業賣晒，去盡情消費，享受餘生，我Buy o架。至於買樓投資，其實業主都要處理放租、裝修等事宜，唔係咁簡單。

石國強表示，股票升幅往往及不上物業。	Anlou	蔡小姐

投資原則：留命再戰江湖，不要着重勝負　沽空睇錯市 兩日輸一球

王：自稱佛系投資者王善行

王：我一向係跌市賺錢，因升市多數係一級級，但跌市就係人踩人，瞬間直插，幅度夠大。對上一次大賺，就係睇中跌市，重錘出擊，再加槓桿。

彩兒：槓桿風險好大噃！

王：忌跌市直接沽空！宜用認沽期權，咁最大損失就係期權金。輸得最甘嗰次，就係因直接沽空，睇錯市，僅兩日就輸近百萬元。跌市當日我返緊工，見自己個倉每五分鐘就無咗10萬元。借機出去冚倉，點知因跌得太急，買賣方變得保守，買賣差價好闊，無得用合理價平倉，焗輸。另外，我睇淡下半年市況，所以早將七成資金轉番現金。

投資原則：不存僥倖心態投資　低撈港交所 沽貨賺40萬

陳：荃灣股神 陳志強

Kitty：美股係咁升，港股就反覆向下，究竟係咩玩法？

彩兒：玩到大家都得番半條人命。

陳：見怪不怪。我一九六八年開始投資，喺股場打滾咗50年，有咩風浪未見過。依家最好就係抖吓先，唔好入市住。

Kitty：你竟然忍到手？

陳：中美貿易戰喎，可大可小。我年紀大，唔可以畀番佢（輸番落去），所以就唔博啦。我投資一向穩陣，做足功課選股，買一兩隻前景好嘅就夠。我有幾隻愛股，包括恒基地產（00012）、香港交易所（00388）及騰訊控股（00700）等，全部都喺低位入市，所以都算豐收。1.2元開始買入恒地，10元買入港交所，4元買入騰訊，之後不斷追沽，依家無晒貨喇。

最記得就係，於152元買入1萬股港交所，之後喺192元沽，賺40萬元。至於騰訊，佢一拆五時，我就同佢斷絕關係，所以再升都唔關我事。

彩兒：無人能捕捉所有升浪，但你能早着先機，已非常成功。

陳：都係靠勤力，投資股票必須睇年報，睇吓公司管理層好唔好，業務係咪年年有增長。買股票就係買未來。年報會詳細列明公司營運及發展路向，有時會遠勝自己所見。情況就好似，我唔入賭場，但都會買賭股成功賺錢。

投資原則：股票難搵食，跑輸畀物業　做生意不如投資的士

石：百福車行董事長石國強

石：股票升幅無物業升值咁和味，所以當你贏幾十萬元時，唔好沾沾自喜，你好大機會輸畀持有物業或的士嘅。

Kitty：有得賺，畀我已經好滿足。

石：但點都會唔甘心囉，而租舖做生意仲慘。話說有位生意人，頂咗一間雲吞麵舖嚟做，年租150萬元，出動全家去舖頭幫手，分工做樓面、洗碗及收銀等，最後賺150萬元，都只係夠交租，結果無錢賺，仲要輸埋青春。

若佢當初用150萬元畀的士首期，單憑的士升值，已經印印腳唔使憂啦。

彩兒：無賺就等同蝕通脹。

石：講起通脹，買一杯奶茶，一年前15元，依家就要18元。而買樓等升值，贏通脹綽綽有餘。我再考考你，若你十年前買咗層樓自住，你覺得賺咗定蝕咗？

Kitty：賺啦。

石：我會話蝕，因為物業樓齡愈高，升值的幅度就會愈低。若你近年都有入市，先算係贏家。

投資原則：唔好有投機心態　炒騰訊買錯邊 唔見廿萬

Anlou：散戶 Anlou

Anlou：早年分段買入舜宇光學科技（02382），由1.9元開始買，之後喺6至7元再追入，最終賺逾70萬元。輸得最甘嘅係買騰訊，當時佢分拆，市傳佢股價會跌，點知跌眼鏡轉升，我輸咗20萬元。其實過去賺錢係純屬好彩，無技術可言。我玩Nikon單反相機，睇好佢會大賣，咁啱又發現其相機鏡頭代工商舜宇，就試吓買埋呢隻股票。結果受惠手機大賣，舜宇股價倍數炒上。

彩兒：你自此再無入市？

Anlou：賺咗嘅錢我All-in嚟創業。我估個市仲有得跌，依家無揸股票！我會等恒指跌到25,000點再撈貨，屆時會追入券商股、盈富基金（02800）及細價股。投資點都要做吓功課。用投機心態嘅話，太博啦。

投資原則：一個好機會，勝過日日Trade　死守大堆蟹貨 博返家鄉

蔡：散戶 蔡小姐

蔡：個市一路跌，好多股變蟹貨。唯一慶幸係啲蟹貨夠大隻，夠穩陣，跌都仲可以守，等他朝一日升番。我每隻股票都唔係買好多，我仲未崩潰。

彩兒：邊隻令你咁唔開心？

蔡：騰訊！我喺360元買入，上周跌一跌就唔見逾20元。騰訊唔掂，其他股都跟住無運行。都怪自己貪心，有賺唔沽，依家倒蝕。以前喺銀行做嘢，買咗收息股放埋一邊，唔少都賺息賺價；反而依家無所事事，去股票行打躉，長期睇住個市，身痕買入賣出，仲蝕得多啲。

投資原則：投資要多觀察，找Pattern　美大選買狂人贏 賺10萬

Calvin：香港程式交易研究中心蔡嘉民（Calvin）

Calvin：喺一六年十一月九日，美國總統特朗普當選日，我賺超過10萬元。當時睇Youtube搜尋量排序，特朗普名字嘅搜尋量多過希拉妮，而彩池賠率，特朗普高好多。衡量過勝算及回報，我揀咗買特朗普贏。所以，事先沽墨西哥披索，買入黃金及VIX指數認購期權長倉，仲喺港股開市時沽期指。

彩兒：影響環球股市嘅大事，真難遇。

Calvin：愈大件事，波動愈大，獲利空間愈大。我最近睇實期貨期權未平倉合約數量，因數量愈大，港股翌日波幅都會放大。我仲留意北水撤走速度及牛熊證分布，希望搵到入市線索。

若有料報畀彩兒同Kitty或有嘢問，可電郵money.biz@on.cc

Kitty、彩兒