Market Insight:樓市調整風險增 地產股添憂

土耳其危機未除,但美股一於少理,加上憧憬中美重啟貿易談判,港股連續第二日反彈,恒指及國指昨日皆升逾1%,可惜主板成交進一步縮至936億元,延續近期升市成交縮之勢。

講真,如果中美雙方今次真係傾得掂數,咁就真係近幾個月以來罕有的利好消息!可惜美國總統「侵侵」上任以來不斷向各方開火,令到環球資金都湧入包括美股在內的美元資產,這從美股年內跑贏環球大市可見一二。所以從政治層面考慮,若然「侵侵」有意連任,則中美貿易戰仲有排搞,故大家千祈唔好因為少少反彈,而忘記港股偏淡的大趨勢。

教育航空股唔值博

昨日港股再彈多近400點,部分早前急插的板塊亦借勢反彈,其中教育股普遍向上,中教控股(00839)、宇華教育(06169)、楓葉教育(01317)及新高教集團(02001)升幅介乎4至8%;航空股方面,南航(01055)、東航(00670)及中國國航(00753)則升4至6%。

要留意,上述兩個板塊短期值博率其實都唔算太高,主要考慮到教育行業未來發展仍受制於中央對行業的監管,基本因素有所變質;而後者股價回升則主因人仔跌勢暫見喘定所致。所以,兩個板塊內的股份絕係對技術性反彈多於基本面改善,即使對個別股份有興趣,都建議觀望多一兩日先。

不利因素陸續浮現

另外,里昂發表研究報告指,隨着利率續升、經濟放緩,以及人民幣貶值等因素,香港樓市將面臨近十五年嚟的最大挑戰,又估計未來十二個月樓價將下跌15%。但查實今年以嚟,樓價經已又升咗14%。同時,該行指本地地產股股價將跑輸大市,故下調部分地產股如新鴻基地產(00016)、信和置業(00083)及新世界發展(00017)之投資評級及目標價。

香港樓價受惠美國聯儲局為首的環球央行多年來的量寬政策,刺激資產價格暴升,樓價遠遠超過打工仔負擔水平,去到「堅離地」境界。家陣受環球央行收水、息口上升增加供樓負擔、政府有意壓抑樓價、港股調整等種種不利因素影響,未來地產股前景確係存在隱憂。

古勝