孖妹S檔案：宜做3個月美元定存

Ernest：環球政經局勢唔明朗，包括中美貿易戰及土耳其危機等，投資者追捧避險資產，依家最穩陣就係做三個月美元定存。美國減稅，吸引美企回流，增購美國資產；美國處加息周期，九月份加息幾成定局，預料美元持續強勢。另外，亦可以考慮買入高評級債券，例如美國國債。

梁：買美債都OK，但我認為最好揸Cash！咩都唔搞，泊港元都好，最多輸通脹。近年美股同美債息同步，我唔肯定美股會唔會繼續風光，萬一美股下跌，拖累經濟，聯儲局唔敢加息住，債息跌，投資者一併逃離股債市場，咁買美債，以為防守力強啲，都會無運行。

Kitty：人仔跌咗咁多，我心郁郁想撈。

分段買人幣博回升

梁：我建議做人仔定期，分三個階段入市，分別喺人民幣兌美元6.9、7及7.3水平買入。我估計，喺美國十一月中期選舉，民主黨會取得過半數議席，若中美對峙有所紓緩，人民幣就會回升。

Ernest：我唔建議買人民幣，就算人行撐住，其貶值壓力仍大。

彩兒：要等到十一月，頸都長。你認為短期中美貿易戰會發展成點？

Ernest：會一路打，無咁快完。中美貿易戰對經濟嘅傷害應該要半年至九個月先會浮現。暫時美國喺貿易戰中佔優，因為佢哋依賴嘅中國進口係消費品，但中國依賴嘅美國進口係必需品，例如大豆。唔進口美國大豆，就逼住喺其他市場入口，例如轉買巴西大豆，但價量未必有美國進口咁理想。

中美正面交鋒，中國直接中槍，香港亦會被拖累。睇番環球股市表現，中港股不斷下跌，但美股繼續向上，中美誰勝誰負，都有啲眉目。