孖妹S檔案：定息產品 定驚至啱？

Ernest：高峰資本國際財富管理總監 梁彥穎（Ernest）

梁：基金投資顧問 梁健雄

Kitty：之前跟風追入股王騰訊控股（00700），上周跌到一仆一碌，我都唔知點算好。

彩兒：一齊做定存，坐定定等收息啦。

1.存款 定期息率高 可逾兩厘

彩兒：存款有分活期、定期及外幣存款等。活期存款係其中一種銀行存款，例如出糧戶口，無規定存款期限，款項可隨時存取。大新銀行「易出糧」服務，其額外活期存款年利率高達2.5%。

至於定期存款，顧名思義就係將錢敍做定期，利息一般較活期存款豐厚。但款項唔可以隨時提取，流動性較低，而且面對利率上升風險。

等到期嘅時候，定存先可連本帶利攞番。定存嘅存款期多為一周至三年不等，部分產品每月均會獲派發利息。存款期愈長，利率風險愈高，息率都會愈高。最近多數銀行都調高咗定存年息至逾兩厘。

Kitty：最近人民幣狂瀉，有朋友做咗人仔定存，嗌生嗌死。

彩兒：常見可做嘅外幣定存包括美元、人民幣、英鎊、歐元、加元、澳元及紐元等。外幣定存就比港元定存多咗匯率風險，所以要識睇匯率趨勢，或者有外幣需求先好買，否則賺息都唔夠冚匯率虧蝕。

外幣定存 存美元匯率風險較低

Kitty：存款利息點計？

彩兒：定存所列嘅回報多為年利率。若存入5萬港元，以星展銀行3個月網上定存年利率1.8%，到期利息可獲225港元。（5萬港元 × 3/12 × 1.8%）。

美元利息較港元為高，若存入5萬美元，以永隆銀行美元3個月定存年利率2.5%，到期利息就可獲312.5美元。（5萬美元 × 3/12 × 2.5%）。因美元與港元掛鈎，敍做美元存款所面對嘅匯率風險相當低。

敍做人民幣存款，若存入5萬元人民幣，永隆銀行人民幣3個月定存年利率2.55%，到期利息就可獲318.75元人民幣。（5萬元人民幣 × 3/12 × 2.55%）。最近人民幣持續貶值，賺息隨時唔夠冚匯率虧蝕。

存保計劃 五十萬內存款有保障

Kitty：我啲錢唔多，叫我攞一大筆錢做定存有難度，有冇其他方法逼到我儲錢？

彩兒：月供存款！每月存入一筆固定金額，期滿就可攞番所有本金及利息。當然更彈性供款嘅代價就係其利息回報會較定存低。

Kitty：擺錢喺銀行安唔安全？

彩兒：存保計劃提供部分保障。若存款屬合資格存款，而存錢嘅銀行亦屬計劃成員，倘銀行倒閉，你可獲最高達50萬港元補償。以任何貨幣為單位嘅合資格存款均受保障。合資格存款包括往來帳戶、儲蓄帳戶、用作抵押嘅存款及年期唔超過五年嘅定期存款。

要留意，年期超過五年嘅定期存款、結構性存款（如股票掛鈎及外幣掛鈎存款）、不記名票據（如不記名存款證）及海外存款；存款以外嘅金融產品，包括債券、股票、窩輪、互惠基金、單位信託基金及保險單均不受存保計劃保障。

2.定息債券 新興市危 揀美債穩陣

Kitty：咩係定息債券？

彩兒：買定息債券，就係借錢畀發債機構，發債機構承諾於指定日期償還本金及利息。債券持有人須承受信貸風險，一旦發行人未能履行契約，債券持有人或無法攞番債券嘅利息及本金。

企債吼年期短評級高

梁：此外，投資債券嘅主要風險嚟自利率升跌。目前外圍波動，而且美國加息周期，新債債息不斷向上，且債價下跌，債券唔係話十分吸引。而受土耳其危機影響，有新興市場債券價格喺過去三至六個月唔見一成。所以投資債券要小心揀，目前睇落投資美債好啲。

彩兒：若投資企業債券，都係大同小異，睇風險及回報，留意條款，包括債券孳息率、信貸評級及到期日。最理想嘅情況，當然係債券年期愈短、信貸評級愈高，但又有高孳息率啦。

據花旗銀行網站資料，截至今年八月十六日，蘋果公司企業債獲標普AA+信貸評級，以二○二四年一月到期的債券為例，年孳息率2.61%。高盛集團企業債嘅評級相對較低，標普評級BBB+，二八年五月到期，年孳息率4.19%。若唔怕風險較高，可留意內房企業債，碧桂園（02007）企業債嘅標普信貸評級為BB，二三年一月到期，年孳息率6.44%。

3.債券基金 入場費平 違約風險低

Kitty：債券入場門檻高，仲有乜其他選擇？

彩兒：不如諗債券基金，基金經理一次過買入多隻債券，減低個別債券違約風險，部分回報唔錯！

Kitty：可唔可以同我逐個步驟講點認購？

梁：首先，到銀行選購債券基金。入場費可低至兩萬元。另留意要畀1至2%首次認購費及1.5%基金管理費。第二，睇清投資緊咩資產。最近幾受歡迎嘅基金係安聯收益成長基金-AM穩定月收類股（美元），分別投資股票及債券，包括有相當比重投資於非投資等級嘅高風險債券。

第三，買債券要留意發行年限，即係幾耐先到期，以及債券利率，利息幾多，幾耐收一次。其吸引之處係年收益約達9%，喺證監會認可嘅基金中，佢嘅利息回報都算數一數二。

涵蓋美元資產值投資

彩兒：投資非投資等級嘅高風險債券，要小心！

Ernest：買美債時，要謹記分清基金只係純以美元計價，還是真係投資美國資產，因後者先有投資價值。若你唔係借美元畀人，相反係自己借美元，咁樣捱貴息法，就記住快手轉咗佢。

Kitty：其他債券基金表現又係點？

彩兒：美元高收益債券組別平均喺過去三年年度化回報4.28%，若想穩陣啲，環球企業債券組別平均喺過去三年年度化回報2.45%，美國企業債券組別平均過去三年年度化回報為2.15%，後兩者都係主打美國企業所發行嘅高評級債券。

Kitty、彩兒