絲絲講場：SOHO中國CFO又劈炮 十年5次換足4個
內房股SOHO中國（00410）又有CFO（財務總裁）辭職！尋日公司公布中期業績，同時宣布唐正茂（Sharon Tong）為專注發展其他事務而辭任財務總裁及執行董事職位。計埋Sharon早前再度回巢，過去十年SOHO中國已經換咗五次、共四個CFO！
○七年十月上市嘅SOHO中國，喺上市後八個月首次換CFO，一○年第二任CFO做唔夠兩年便離任，由當時已喺公司任職超過八年嘅Sharon接棒，做咗四年後過檔去紅星美凱龍（01528）。到一六年回巢，前後總共做咗14年，都算係老臣子！
純利跌73% 擬分拆上市
尋日業績會改由財務副總裁張銳映上場，公司董事長潘石屹當然有公開多謝Sharon多年貢獻，但就無透露係咪請緊人或者搵邊個暫代職務。以往佢哋每次有CFO辭職，都會搵○八年由CFO轉任總裁嘅閻岩幫手暫代。不過絲絲好肯定，潘總今次唔會搵閻女士捱義氣，皆因閻女士已經喺今年三月畀全球最大私募股權公司黑石集團撬走咗。
不過即使人事變動，都無影響公司發展，潘總對旗下共享辦公室業務SOHO 3Q有晒計劃，話等香港市場表現好番，就考慮分拆上市；SOHO中國上半年純利倒退近73%，佢話部分物業項目裝修完後，相信估值會提升。
余絲韻