絲絲講場：茅台請釀酒師要體測跑千米

每年人工收13萬人仔

內地職場流傳一句佳話，就係「當白領不如去釀酒！」。一位茅台酒廠工作5年嘅職工講，茅台待遇特別好，每天5小時工作制，普通工人靠公積金就買到樓，每年實收13萬人仔。

七月初，茅台一八年社會招工簡章又出爐，請336名製酒工人，見工要參加文化考試。參加過茅台招工試嘅網友話，文化考試難度看個人，高中學得好，考前做多幾套高考試卷，多背點社會知識就OK。反而係體能測試考起唔少城市宅男宅女。

體能要求接近考警察

按照茅台公司規定，體能測試為男子1,000米跑，女子800米跑，超過4分30秒就肥佬。呢個標準接近內地報考人民警察、消防員嘅體能測評標準嘅4分20秒。

事先聲明，茅台唔係特登留難少做運動嘅朋友。只係夏天時，茅台工場車間嘅溫度高到40幾度，但係因為茅台酒發酵要封閉、高溫，唔可以通風，唔可以裝泠氣，工人實熱到流晒汗。聽講初嚟甫到嘅工人都頂唔順，頭一日返工，對腳就已經好似唔屬於自己！

余絲韻