絲絲講場:沽空機構招兵查數唔使識會計?

早排狙擊過體育用品股與舜宇光學科技(02382)嘅會計研究機構GMT Research又有新動作!不過今次唔係有新沽空對象,而係招兵買馬!明嘅,食大茶飯前要先有人才。

話說GMT喺社交網站發文,為香港辦事處搵Intern(實習生),名額只有一個,講明係做一個為期兩至四個星期有關「會計欺詐」(Accounting Frauds)項目。

一個月後有機會出擊

但奇就奇在呢位實習生唔需要有會計技能!查人哋條數但唔使識會計?咁即係做啲乜?唔通係街訪、打電話定係咩呢可?

至於人工福利?唔好意思,個Post無寫,不過就講明工作會「fun and interesting」咁話。如果可以參與沽空行動,咁就真係非一般實習經驗喎!

話時話,咁計落,咪即係大概一個月之後有機會爆出下一個狙擊目標呢?唔知有冇行家會Send電郵應徵去做「無間道」呢?

余絲韻