美國經濟教授研究發現，求婚戒指與婚禮使費愈貴，離婚機會愈高！
呢個研究調查咗超過3,000名曾經歷婚姻人士嘅個案，發現求婚戒指價錢去到貴過2,000美元（約1.56萬港元）水平，日後婚姻愈難持久，喺男士身上尤其明顯，花2,000至4,000美元（約1.56萬至3.12萬港元）去買求婚戒指嘅男士，日後出現離婚情況比花500至2,000美元（約3,900至1.56萬港元）嘅，高出1.3倍！
至於婚禮使幾多錢亦有玄機。花逾兩萬美元（約15.6萬港元）嘅婚禮，啲女士離婚機會大增1.6倍！而最能保證可白頭到老嘅，係使少過1,000美元（約7,800港元）嘅婚禮。
相反有樣嘢，新人愈肯畀錢，婚姻愈持久——研究發現，就係蜜月旅行！喂有數據，有真相，不妨剪存定，慳番啖氣唔使拗。
余絲韻